Mehreen Pirzada: పంజాబీ భామ మెహ్రీన్ పిర్జాదాను కొత్తగా పరిచయం చేయాల్సిన అవసరం లేదు. అతి చిన్న వయసులోనే మోడలింగ్ లోకి ప్రవేశించిన ఈ ముద్దుగుమ్మ పదేళ్ల వయసులో మొదటి ర్యాంప్ వాక్ చేసి కసౌలీ ప్రిన్సెస్ టైటిల్ను గెలుచుకుంది. 2016లో వచ్చిన తెలుగు చిత్రం కృష్ణ గాడి వీర ప్రేమ గాధ తో మెహ్రీన్ తన నటనా వృత్తిని ప్రారంభించింది. ఇందులో న్యాచురల్ స్టార్ నానికి జోడిగా నటించి మెప్పించింది. తొలి సినిమాతోనే యూత్ లో విపరీతమైన ఫాలోయింగ్ ను సంపాదించుకుంది.
ఆ తర్వాత తెలుగులో వరుస సినిమాలు చేస్తూ దూసుకుపోయింది. మహానుభావుడు, రాజా ది గ్రేట్, ఎఫ్ 2 వంటి చిత్రాలు టాలీవుడ్ లో మెహ్రీన్ కు భారీ క్రేజ్ తెచ్చిపెట్టాయి. అలాగే హిందీ, తమిళ్, పంజాబ్ భాషల్లో సైతం అడపా తడపా సినిమాల్లో యాక్ట్ చేసిన మెహ్రీన్.. 2021లో సడెన్ గా పెళ్లి కబురు చెప్పి అందరినీ ఆశ్చర్యపరిచింది. హిసార్ ఎమ్మెల్యే కుల్దీప్ బిష్ణోయ్ కుమారుడు, హర్యానా రాష్ట్ర మాజీ ముఖ్యమంత్రి భజన్ లాల్ మనవడు భవ్య బిష్ణోయ్ తో ఏడడుగులు వేయబోతున్నట్లు వెల్లడించింది. 2021 మార్చిలో భవ్య బిష్ణోయ్, మెహ్రీన్ ల ఎంగేజ్మెంట్ కూడా జరిగింది. కానీ పెళ్లి వరకు వెళ్లకుండానే ఈ జంట విడిపోయారు. తమ నిశ్చితార్థాన్ని రద్దు చేసుకున్నారు. పెళ్లి క్యాన్సిల్ అయ్యాక మెహ్రీన్ కెరీర్ పరంగా మునుపటి జోరును చూపించలేకపోతోంది.
అడపా తడపా సినిమాలు చేస్తూ నెట్టుకొస్తోంది. ఇదిలా ఉంటే.. పెళ్లి కాకుండానే మెహ్రీన్ తల్లి కావాలని తపన పడుతోంది. అవును మీరు విన్నది నిజమే. పిల్లల కోసం మెహ్రీన్ ఎగ్ ఫ్రీజింగ్ పద్ధతిని ఎంచుకుంది. స్త్రీ యొక్క ఆరోగ్యకరమైన అండాల్ని భద్రపరుచుకునే ప్రక్రియనే ఎగ్ ఫ్రీజింగ్ అంటారు. గర్భధారణను వాయిదా వేయడానికి ఈ సాంకేతికత ఉపయోగించబడుతుంది. పిల్లలను కనాలి అనుకున్నప్పుడు భద్రపరిచిన ఎగ్స్ ను కరిగించి, ఫలదీకరణం చేసి, పిండాలుగా గర్భాశయానికి బదిలీ చేస్తారు. ఇటీవల కాలంలో చాలా మంది హీరోయిన్స్ ఎగ్ ఫ్రీజింగ్ వైపు మొగ్గు చూపుతున్నారు. తాజాగా ఈ జాబితాలో మెహ్రీన్ కూడా చేరింది. వివాహం కాకుండానే ఆమె తన ఎగ్స్ ను భద్రపరుచుకుంది. అంతేకాకుండా తన ఎగ్ ఫ్రీజింగ్ జర్నీని ఇన్స్టాగ్రామ్ ద్వారా మెహ్రీన్ పంచుకుంది. ఈ సందర్భంగా ఆమె కొన్ని ఆసక్తికర వ్యాఖ్యలు చేసింది.
`ఎగ్ ఫ్రీజింగ్ ప్రక్రియ వైపు వెళ్లడానికి దాదాపు 2 ఏళ్ల నుంచి ట్రై చేస్తున్నాను. ఫైనల్ గా నేను ఇది చేశాను. అందుకు ఎంతో సంతోషంగా ఉంది. ఇది నా వ్యక్తిగత విషయం.. అందరితో పంచుకోవాలా ?వద్దా? అని ఆలోచించాను. కానీ నాలాంటి చాలా మంది మహిళలు ఉన్నారు. వారు ఎప్పుడు పెళ్లి చేసుకోవాలి లేదా ఎప్పుడు బిడ్డను కనాలి అని ఇంకా నిర్ణయించుకోలేదు. అలాంటి వారి కోసం నేను ఈ విషయాన్ని పంచుకుంటున్నాను. తల్లి కావాలనేది నా కల. అయితే అందుకు కొన్ని సంవత్సరాలు ఆలస్యం కావొచ్చు. అందుకే ఎగ్ ఫ్రీజింగ్ చేయించుకున్నా. భవిష్యత్తు కోసం ఇది చాలా ముఖ్యమని నేను భావిస్తున్నాను.
ఎగ్ ఫ్రీజింగ్ అనేది ఎంతో సవాలుతో కూడుకున్నది. ముఖ్యంగా ఇన్జెక్షన్స్, బ్లడ్ మరియు హాస్పిటల్స్ ఫోబియా ఉన్న నాలాంటి వారికి ఇంకా కష్టంగా ఉంటుంది. హార్మోన్ల ఇంజక్షన్స్ కారణంగా ఆసుపత్రికి వెళ్లిన ప్రతిసారీ నేను కళ్లు తిరిగి పడిపోయాను. కానీ ఎగ్ ఫ్రీజింగ్ ఎంతో విలువైనది. అందరు స్త్రీలు దీన్ని చేయాలని నేను భావిస్తున్నాను. నా ఎగ్ ఫ్రీజింగ్ జర్నీలో తోడుగా గైనకాలజిస్ట్ డాక్టర్ రిమ్మీ మరియు నిరంతరం నా పక్కనే ఉన్న అమ్మకు ధన్యవాదాలు` అంటూ మెహ్రీన్ తన ఇన్స్టాగ్రామ్ పోస్ట్ లో రాసుకొచ్చింది. దీంతో మెహ్రీన్ లేటెస్ట్ పోస్ట్ ఇప్పుడు వైరల్ గా మారింది.
https://www.instagram.com/reel/C6Xm-TwvinC/?utm_source=ig_web_copy_link