మ‌రోసారి పింఛ‌న్ల వ్య‌వ‌హారం రాష్ట్రంలో చ‌ర్చ‌కు వ‌చ్చింది. మరో రెండు రోజుల్లోనే మే 1వ తారీకు వ‌చ్చే స్తోంది. ఈ నేప‌థ్యంలో 66.7 ల‌క్ష‌ల మందికి సామాజిక భ‌ద్ర‌తా పింఛ‌న్లు మంజూరు చేయాలి. అయితే.. గ‌త నెల మార్చి 1వ తేదీ వరకు ఇంటింటికీ వెళ్లిన వ‌లంటీర్లు.. వీటిని ల‌బ్దిదారులు కాలు క‌ద‌ప‌కుండానే ఇంటి ముందు అందించారు. ఈ నెల‌కు వ‌చ్చే స‌రికిమాత్రంవ‌లంటీర్ల‌ను క‌ట్ట‌డి చేశారు. దీంతో పింఛ‌న్ల వ్య‌వ‌హారం.. తీవ్ర వివాదాస్ప‌దం అయింది.
వ‌లంటీర్ల‌కు ఇంటికి వెళ్లే అవ‌కాశం లేకుండా చేయ‌డంతో గ్రామ, వార్డు స‌చివాల‌యాల‌కు వ‌చ్చి.. గంట‌ల త‌ర‌బ‌డి ఎదురుచూసే ప‌రిస్తితి వ‌చ్చింది. ఈ ప‌రిణామం ల‌బ్దిదారుల‌కు క‌ళ్లు బైర్లు క‌మ్మేలా చేసింది. 33 మంది వృద్దులు కూడా చ‌నిపోయిన‌ట్టు అధికారిక లెక్కలు చెబుతున్నాయి. దీనిని వైసీపీ టీడీపీ ఖాతాలో వేసింది. టీడీపీ మాత్రం… దీనికి త‌మ త‌ప్పు లేద‌ని.. వైసీపీ కావాల‌నే చేసింద‌ని చెబుతోంది. అయినా.. వైసీపీ వ్యూహమే పైచేయి సాధించింది.
ఈ ప‌రిణామాల‌తో ఉలిక్కి పడిన టీడీపీ.. మే 1 న ఇచ్చే పింఛ‌న్ల‌పై ముందుగానే అలెర్ట‌యింది. ఈ నెల 15వ తేదీ నుంచే మే 1వ‌తేదీన ఇచ్చే పింఛ‌న్ల‌పై దృష్టి పెట్టి.. అటు ఎన్నిక‌ల సంఘానికి, ఇటు ప్ర‌భుత్వ ప్ర‌ధాన కార్య‌ద‌ర్శికి కూడా ఇంటింటికీ వెళ్లి ఇచ్చేలా .. విన్న‌పాలు చేసింది. వ‌లంటీర్ల జోక్యాన్ని క‌ట్ట‌డి చేసింది. కానీ.. టీడీపీ ఇంత ముందే మేల్కొన్నా.. ఇక్క‌డ కూడా.. వైసీపీ వ్యూహాత్మ‌కంగానే అడుగులు వేసింది. అస‌లు ఎవ‌రూ వ‌ద్దు .. పింఛ‌న్ల‌ను ల‌బ్దిదారుల బ్యాంకు అకౌంట్ల‌లో వేస్తామ‌ని ప్ర‌భుత్వం తేల్చి చెప్పింది.
అయితే.. ఇది ఏప్రిల్‌లో 1వ తేదీ నుంచి 6వ తేదీ వరకు జ‌రిగిన వివాదం కంటే కూడా ఎక్కువ‌గానే జ‌రిగే అవ‌కాశం క‌నిపిస్తోంది. ఎందుకంటే.. గ్రామ వార్డు స‌చివాల‌యాలు.. ఇళ్ల‌కు కాస్త దూరంలోనే ఉండేవి.పైగా అక్క‌డ‌కు వెళ్తే.. నిముషాల వ్య‌వధిలోనే ప‌నిజ‌రిగిపోయింది. కానీ, ఇప్పుడు బ్యాంకుల్లో వేస్తే.. (సుమారు 52 ల‌క్ష‌ల మందికి ఇలానే చేయ‌నున్నారు.) ల‌బ్ధి దారులు త‌ప్ప‌ని స‌రిగా బ్యాంకుల‌కు క్యూ క‌ట్టాలి. అక్క‌డ గంట‌ల కొద్దీ నిరీక్షించాలి. పైగా ఓచ‌ర్లు ఫిల్ చేయాలి. చేసినా.. వేచి ఉండాలి.
ఇది వృద్ధులు, దివ్యాంగులు వంటివారికి మ‌రింత క‌ష్టం. అప్పుడు కూడా.. టీడీపీపైనే వైసీపీ నెపం వేసేయ‌డం ఖాయం. అలాగ‌ని టీడీపీ దీనిని వ్య‌తిరేకించే ప‌రిస్థితి లేదు. ఇంకోవైపు.. ల‌బ్దిదారులు ఖ‌చ్చితంగా తాము ప‌డుతున్న క‌ష్టాల‌కు టీడీపీనే కార‌ణ‌మ‌ని చెప్పే అవ‌కాశం ఉంది. ఇలా.. ఏ విధ‌గా చూసుకున్నా మ‌రోసారి టీడీపీ వైసీపీ ఉచ్చులో చిక్కుకున్న‌ట్టే అయింద‌ని అంటున్నారు ప‌రిశీల‌కులు.