ఉమ్మ‌డి గుంటూరు జిల్లాలో కీల‌క‌మైన నియోజ‌క‌వ‌ర్గం గుంటూరు వెస్ట్. ఇక్క‌డ నుంచి వైసీపీ, టీడీపీ త‌ర‌పున బీసీ మ‌హిళ‌లు పోటీ చేస్తున్నారు. నిజానికి రాష్ట్రంలో ఇలా ఇద్ద‌రు మ‌హిళ‌లు పోటీ ప‌డుతున్న స్థానాల్లో ఇది చాలా కీల‌కంగా మారింది. ఎందుకంటే అటు వైపు మంత్రి.. ఇటు వైపు బిజినెస్ ఉమ‌న్‌. ఇద్ద‌రూ ఉన్న‌త విద్యావంతులే. ఇద్ద‌రూ ఆర్థికంగా బ‌లంగా ఉన్న వారే. ఇద్ద‌రూ బీసీలే. అయితే ర‌జ‌క సామాజిక వ‌ర్గానికి చెందిన మ‌హిళ‌కు టీడీపీ సీటు ఇవ్వ‌డం.. ఆమె లోకల్ కావ‌డంతో రాజకీయం మారుతోంది.
ఇక ఇద్ద‌రూ బీసీ వ‌ర్గానికి చెందిన మ‌హిళ‌లు.. ఇద్ద‌రూ ఉన్న‌త విద్యావంతులు కావ‌డంతో వీరిలో ఎవ‌రిని ఎన్నుకోవాలి? ప్ర‌జ‌ల‌కు ఎవ‌రికి ఓటేయాలి? ఇది మీకు, మాకు కాదు. నియోజ‌క‌వ‌ర్గంలోనే వినిపిస్తున్న ప్ర‌శ్న. ఇక, అభ్య‌ర్థుల విష‌యానికి వ‌స్తే.. టీడీపీ నుంచి పిడుగురాళ్ల మాధ‌వి, వైసీపీ నుంచి మంత్రి విడుద‌ల ర‌జ‌నీ పోటీలో చేస్తున్నారు. ఇద్ద‌రి పేర్లూ.. ఆక‌ర్ష‌ణీయం. ప్ర‌తి ఒక్క‌రికీ గుర్తుండేదే కావ‌డం గ‌మ‌నార్హం. ఇద్ద‌రూ స‌మ ఉజ్జీలే క‌దా! అనే చ‌ర్చ గుంటూరు వెస్ట్‌లో జోరుగా సాగుతోంది.
ఈ విష‌యంపై స్థానికంగా ఉన్న కొంద‌రు మీడియా మిత్రులు ఆరా తీశారు. దీనిలో ప్ర‌జ‌లు ఆస‌క్తిక‌ర విష యాలు వెల్ల‌డించారు. ప్ర‌ధానంగా స్థానిక‌త‌కు వారు జై కొడుతున్నారు. ఇది వాస్త‌వం కూడా. ఈ విష‌యం లో ర‌జ‌నీ చాలా వెనుక‌బ‌డ్డారు. ఇది టీడీపీ త‌ర‌ఫున పోటీ చేస్తున్న మాధ‌వికి ప్ల‌స్ అవుతోంది. `ఆమెవ‌రో మాకు తెలుసు. ఎప్ప‌టి నుంచో చూస్తున్నాం. ఇది ఆమె మెట్టినిల్లు` అని మాధ‌వి గురించి జ‌నాలు చెబుతున్నారు. అంతేకాదు.. ఆమె ఈ జిల్లాకు చెందినామే అని కూడా అనేస్తున్నారు.
ఈ లోకల్ టాక్ ర‌జ‌నీకి రావ‌డం లేదు. పైగా.. ఆమె నియోజ‌క‌వ‌ర్గం మారడం.. చిల‌క‌లూరిపేట నుంచి గుంటూరు వెస్ట్‌కు వ‌చ్చి పోటీ చేయ‌డం వంటివి కూడా ఆస‌క్తిగా మారాయి. పైగా ఆమె చిల‌క‌లూరిపేట‌కే లోకల్ కాదు.. ఎక్క‌డో తెలంగాణ అమ్మాయి.. అదే మాధ‌వి ఇక్క‌డే పుట్టి పెరిగి.. ఇక్క‌డ స‌మ‌స్య‌లపై పూర్తి గ్రిప్ ఉన్న ఆమె అన్న‌దే లోక‌ల్‌గా బాగా వినిపిస్తోంది. ఇక ర‌జ‌నీపై ఆమె `అక్క‌డెందుకు పోటీ చేయ‌ట్లే దు? ఆవిడ తెలంగాణ మ‌నిషి. పోయిన ఎన్నిక‌ల్లో పేట నుంచి గెలిచారు. అక్క‌డే గెల‌వొచ్చుగా. ఏదో తేడా ఉంది. అందుకే ఇక్క‌డ‌కు వ‌చ్చారు. ఇప్పుడు మేం మా ఇల్లు స‌రిచేసుకుంటాం కానీ.. ఎక్క‌డినుంచో వ‌చ్చిన వారి ఇంట్లో దీపం పెట్టలేం` అని మ‌హిళ‌లే ముక్త‌కంఠంతో చెబుతున్నారు.
ఈ ఒక్క విష‌యం ర‌జ‌నీని ఓట‌ర్ల‌కు చాలా దూరం చేసేసింది. ఆమె ఇప్పుడు మంత్రి, డ‌బ్బున్న నాయ‌కురాలే కావొచ్చు. మాట‌ల మాంత్రికురాలే కావొచ్చు. కానీ, నియోజ‌క‌వ‌ర్గం ప్ర‌జ‌ల్లో గూడుక‌ట్టుకున్న లోకల్-నాన్‌లోక‌ల్ అనే విష‌యంలో మాత్రం ర‌జ‌నీ.. తేలిపోతున్నారు. అందుకే.. ఈ విష‌యం తెలుసా మేడం ? అనే ప్ర‌శ్న‌లు తెర‌మీదికి వ‌స్తున్నాయి.