టీడీపీలో ఈక్వేషన్ మారిపోయింది. నిన్న మొన్నటి వరకు టికెట్పై సందేహంతో కునుకు కూడా పట్టని ఆ పార్టీ కురువృద్ధుడు గోరంట్ల బుచ్చయ్య చౌదరికి తాజాగా పార్టీ అధిష్టానం నుంచి తీపి కబురు అందినట్టు సమాచారం. ప్రస్తుతం రాజమండ్రి రూరల్ నియోజకవర్గం నుంచి ప్రాతినిధ్యం వహిస్తున్న గోరంట్లకు.. వచ్చే ఎన్నికల్లో టికెట్ కష్టాలు పట్టుకున్నాయని కొన్ని రోజులుగా వార్తలు వస్తున్నాయి. ఇక్కడి టికెట్ను జనసేన కోరుతోందని కూడా ప్రచారంలోకి వచ్చింది.
దీంతో గోరంట్ల ఒకింత అలకపాన్పు ఎక్కారు. విషయం గ్రహించిన.. పార్టీ అధినేత చంద్రబాబు.. తాజాగా బుచ్చయ్యకే టికెట్ ఇవ్వాలని నిర్ణయించుకున్నట్టు పార్టీలో ప్రచారం జరుగుతోంది. ప్రస్తుతం ఉమ్మడి తూర్పుగోదావరి జిల్లాలోని స్థానాలకు దాదాపు అభ్యర్థులను ఖరారు చేశారు. వీరిలో చాలా మంది పాతకాపు లే ఉన్నారు. ఈ క్రమంలోనే గోరంట్లకు ఛాన్స్ ఇస్తూ.. నిర్ణయం తీసుకున్నారు. ఇక, ఈ టికెట్ను జనసేన ఆశిస్తోందని ప్రచారంలోకివచ్చింది.
కానీ, బుచ్చయ్యకు లాస్ట్ చాన్స్ ఇవ్వాలని నిర్ణయించుకున్న దరిమిలా.. ఆయన అభ్యర్థిత్వం ఖరారైనట్టు తెలుస్తోంది. ఇటీవల తనపై వస్తున్న వార్తల నేపథ్యంలో బుచ్చయ్య చౌదరి.. పార్టీ అధిష్టానానికి లేఖలు సంధించారు. తనకు ఇదే ఆఖరి సారని.. వచ్చే ఎన్నికల నాటికి తప్పుకొంటానని ఆయన పేర్కొన్నారు. దీనికితోడు.. పార్టీ సిట్టింగ్ స్థానాలకు అభ్యర్థులను మార్చేది లేదని.. చంద్రబాబు గతంలోనే ఇచ్చిన హామీ మేరకు బుచ్చయ్య వైపే పార్టీ మొగ్గు చూపినట్టు తెలుస్తోంది.
ఇక, జనసేన పరంగా చూస్తే.. కందుల దుర్గేష్ .. రాజమండ్రి రూరల్ సీటు కోరుతున్నా.. ఆయనను వేరే నియోజకవర్గానికి తరలించే అవకాశం ఉందని తెలుస్తోంది. దుర్గేష్ రూరల్ నియోజకవర్గంలో జనసేనకు బలమైన నేత. జనసేనలో నాదెండ్ల తర్వాత ప్లేస్లో ఆయన ఉన్నారు. పైగా బలమైన కాపు సామాజిక వర్గ నేత. గత ఎన్నికల్లో జనసేన నుంచి పోటీ చేసి 40 + వేల పై చిలుకు ఓట్లు తెచ్చుకున్నారు. అక్కడ దుర్గేష్ అంత భారీగా ఓట్లు చీల్చడంతోనే బుచ్చయ్య చౌదరి 11 వేల ఓట్ల మెజార్టీతో గెలిచారు.
ఇప్పుడు బుచ్చయ్యకు రాజమండ్రి రూరల్ ఇచ్చేసి దుర్గేష్కు కాకినాడ రూరల్ సీటు ఇస్తారని ప్రచారం జరుగుతోంది. కానీ, దీనిని దుర్గేష్ ఓకే చెబుతారా? లేదా? అనేది తేలాల్సి ఉంటుంది. దుర్గేష్ రాజమండ్రి రూరల్ నియోజకవర్గంలో జోరుగా ప్రచారం చేస్తున్న విషయం తెలిసిందే ప్రతి ఇంటికీ తిరుగుతున్నారు. దాదాపు టికెట్ నాదే అన్నతరహాలో కందుల ప్రచారం ఉంది. ఇలాంటి సమయంలో అనూహ్యంగా తెరమీదికి వచ్చిన మార్పు.. ఎలాంటి పొలిటికల్ సీన్ క్రియేట్ చేస్తుందో చూడాలి.