Botcha satyanarayana : సీనియ‌ర్ రాజ‌కీయ వేత్త, ఆంధ్రప్రదేశ్ మున్సిపల్ మంత్రి బొత్స సత్యనారాయణ రాజ‌కీయంగా విభిన్నంగా ఉంటుంటారు. కుండ‌బ‌ద్ద‌లు కొట్టిన‌ట్లు మ‌న‌సులో మాట చెప్పేయ‌డంలో ఆయ‌న దిట్ట. తాజాగా ఏపీ ప్ర‌భుత్వ విధానాల గురించి మంత్రి బొత్స మ‌రోమారు అలా చెప్పేశారు. తాజాగా రాజమండ్రిలో మంత్రి బొత్స సత్యనారాయణ మీడియాతో మాట్లాడుతూ ఏ క్షణం అయినా పరిపాలన రాజధానిని విశాఖకు తరలిస్తామని సంచలన ప్రకటన చేశారు. దీంతో మూడు రాజధానుల అంశం మ‌ళ్లీ హాట్ టాపిక్ అయింది.
Botcha satyanarayana బొత్స ఏమంటున్నారంటే…
రాజమండ్రిలో మంత్రి బొత్స సత్యనారాయణ మీడియాతో మాట్లాడుతూ రాజధానులపై టీడీపీ కోర్టుకు వెళ్ళి అభివృద్ధి అడ్డుకుంటుందని ఆరోపించారు. కోర్టులో ఉన్న అంశాన్ని అధిగ‌మించి ఏ క్షణమైనా పరిపాలన రాజధానిని విశాఖకు తరలిస్తామని అన్నారు. రాష్ట్ర అభివృద్ధికి ఉన్న అద్భుతమైన అవకాశాన్ని గత ఐదేళ్ల చంద్రబాబు పాలనలో దుర్వినియోగం చేశారని మంత్రి బొత్స విమర్శించారు. అవినీతి, ఒక వర్గం రాజధానిగా అమరావతిని చేయడంతో అభివృద్ధిని 20 ఏళ్ళ వెనక్కి తీసుకెళ్లారని వ్యాఖ్యానించారు. రాష్ట్ర సమగ్ర అభివృద్ధి కోసమే సీఎం జగన్ మూడు రాజధానుల చట్టం చేశారని తెలిపారు. ఏపీలో మూడు ప్రాంతాల అభివృద్ధికి కృషి చేయాలన్నదే సీఎం జగన్ సంకల్పమని మంత్రి బొత్స పేర్కొన్నారు. జడ్పీటీసీ , ఎంపీటీసీ , మిగిలిన 32 కార్పొరేషన్ ,మున్సిపల్ , సహకార ఎన్నికలు త్వరితగతిన పూర్తి చేస్తామని అన్నారు.
రాజమండ్రి ఆఫ‌ర్లు…
రాజమండ్రిని అద్భుతమైన నగరంగా అభివృద్ధి చేస్తామని మంత్రి బొత్స తెలిపారు. సెంట్రల్ వెజిటబుల్ మార్కెట్ ను సరైన స్థలం ఎంపిక చేసి త్వరలోనే తరలిస్తామని తెలియజేశారు. రాజమండ్రి- కార్పొరేషన్ ఎన్నికలు కోర్టు అడ్డంకులు తొలగిపోగానే విలీన గ్రామాలతో కలిపే నిర్వహిస్తామని వెల్లడించారు. కాగా మంత్రి బొత్స కామెంట్ల‌తో మూడు రాజధానుల అంశం మ‌ళ్లీ తెర‌మీద‌కు వ‌చ్చింది.