టెక్నాలజీ కొత్త పుంతలు తొక్కుతుంది. అన్ని రంగాలలోను సాంకేతిక పరిజ్ఞానంలో మార్పులు వస్తున్నాయి. రంగం ఏదైన జరగబోయే పరిణామాలను ముందుగానే అంచనా వేసి ఖచ్చితమైన సమాచారాన్ని అందించేదే.. డేటాసైన్స్‌.
సుమారు 10 సంవత్సరాల క్రితం వరకు పరిచయం లేని డేటా సైన్స్. ప్రస్తుతం అత్యంత ప్రాచుర్యం పొందింది. ఉద్యోగం ఉన్నవారు, లేనివారి నోటా తరచూ వినిపిస్తుంది. ఉద్యోగ అవకాశాల్లో దాదాపు 28 శాతం అభివృద్ధి కానున్నట్లు ప్రముఖ సంస్థ గ్లాస్ డోర్ అంచనా. వివిధ రంగాల్లో ఇదివరకే అనుభవం ఉన్నవారు కూడా దీనిలో ప్రవేశించడానికి ఉత్సాహం చూపిస్తున్నారు అంటే ఇందులోని ప్రత్యేకతలు ఎన్నో. కొనుగోలు పద్ధతుల ద్వారా వినియోగదారుల అభిరుచులు, ఆంక్షలను శాస్త్రీయ సాంకేతిక పద్దతుల ద్వారా ముందుగానే తెలుసుకోవడం. అలా వారి అంచనాల మేరకు ఉత్పత్తులను రూపొందించి వారి నమ్మకాన్ని పొందడం ద్వారా వ్యాపారాభివృద్ధి, విస్తరణలు త్వరగా సాధ్యమవుతాయి. ఈ వ్యాపార కోణం నుంచి పుట్టినదే ఈ డేటా సైన్స్.
డేటాసైన్స్‌ను గణాంక సహిత సమాచారాన్ని విశ్లేషించడానికి ఉపయోగించే సాధనం. ఇది అల్గారిథం, మెషిన్‌లెర్నింగ్‌ సిద్ధాంతాలను ఉపయోగించి వ్యాపారానికి కావలసిన వస్తువులు ప్రతి సంవత్సరం ఎంత మొత్తంలో అమ్మకాలు జరుగుతున్నాయి. అప్పుడు డిమాండ్‌ –సప్లయ్‌ ఏ విధంగా ఉంది. ప్రస్తుతం ఆ వస్తువులపై వినియోగదారుల అభిప్రాయం ఏంటి, డిమాండ్‌ ఎందుకు లేదు, కొనుగోల్లో వచ్చిన మార్పులు ఏంటి. ఇలాంటి విషయాలను అంచనా వేసి చెబుతారు. గతంలో ఉన్న డిమాండ్‌ను ప్రస్తుత డిమాండ్‌తో పోల్చి విశ్లేషించి వినియోగ దారులకు అందుబాటులో ఉంచాల్సిన ప్రొడక్ట్స్‌ సంఖ్యతో సహా కచ్చితమైన లెక్కలతో వివరించేవారే డేటా నిపుణులు.
విద్య, వైద్యం, వ్యాపార, సామాజిక ఆర్థిక, రాజకీయం.. ఇలా రంగం ఏదైనా గతంలో ఎదుర్కొన్న ఒడిదుడుకుల సమాచారాన్ని తెలుసుకొని.. భవిష్యత్తులో ఎలాంటి వ్యూహాలను అనుసరిస్తే.. ఆయా రంగాల్లో విజయం సా«ధించడానికి వీలుంటుందో ఖచ్చితంగా అంచనా వేసి చెప్పే వారే.. డేటా సైంటిస్టులు.నిర్దిష్ట పరిశ్రమ పరిజ్ఞానం ప్రోగ్రామ్లో గణితం గణాంక శాస్త్రం మౌలికాంశాలపై బాగా పట్టు ఉన్న వారు ఈ రంగంలో రాణిస్తారు.
కావలసిన నైపుణ్యాలు :
ఈ రంగంలో నిలదొక్కుకోవాలంటే వాణిజ్య రంగానికి మూలమైన డేటా సేకరణ, ఆకృతీకరణ, నిర్వహణ, విశ్లేషణ బాధ్యతలను నిర్వహిస్తూ ఉండాలి. అలాగే సమాచారానికి అనుగుణంగా నిర్ణయాలు తీసుకునేలా డేటాను విశ్లేషించే వారై ఉండాలి. అలాగే విలువైన సమాచారాన్ని రాబట్టగలగాలి. ఇన్ని ఆకర్షణలు ఉన్నా ఈ రంగంలో వివిధ స్థాయిలో ఉద్యోగాలు ఉంటాయి. ముఖ్యంగా డేటా సైంటిస్ట్, డేటా ఇంజనీర్, డేటా ఎనాలసిస్ మెషిన్ లర్నింగ్, ఇంజనీరింగ్ స్టాటిస్టిషియన్, డేటా సైన్స్ కన్సల్టెంట్, డేటా ఆర్కిటెక్చర్, డేటాబేస్ అడ్మినిస్ట్రేటర్ ఇందులో ఉద్యోగాలు దక్కించుకున్న వారికి వార్షిక వేతనం 6లక్షలు ఉంటుంది. నైపుణ్యాలు, అనుభవం ఆధారంగా వేతనం పెరిగే అవకాశం ఉంది.