Silk Smitha: విజయలక్ష్మి వడ్లపాటి అంటే చాలా మందికి తెలియకపోవచ్చు. కానీ సిల్క్ స్మిత అంటే మాత్రం తెలియని వారు ఉండరు. పశ్చిమ గోదావరి జిల్లా ఏలూరు సమీపంలో ఒక నిరుపేద కుటుంబంలో జన్మించిన సిల్క్ స్మిత‌కు 15 ఏళ్లకే త‌ల్లిదండ్రులు వివాహం చేశారు. అత్తింటి వేధింపులు భరించలేక పెళ్లి జ‌రిగిన కొంత కాలానికి సిల్క్ స్మిత మ‌ద్రాసు పారిపోయింది. సినీ ఇండ‌స్ట్రీలోకి వెళ్లి హీరోయిన్ కావాల‌ని ఆశ‌ప‌డింది. ఎన్నో క‌ష్టాలు, అవ‌మానాలు, తిర‌స్క‌ర‌ణ‌ల అనంత‌రం సిల్క్ టచప్ ఆర్టిస్ట్‌గా కొన్నాళ్లు పనిచేసింది. ఆ తర్వాత చిన్న, చిన్న పాత్ర‌ల‌తో సినిమాల్లోకి ఎంట్రీ ఇచ్చింది.
80వ దశకంలో వెండితెరపై శృంగార తారగా సిల్క్ స్మిత ఓ వెలుగు వెలిగింది. మత్తెక్కించే కళ్ళు, మైమరిపించే అందంతో సినీ పరిశ్రమను ఓ ఊపు ఊపేసింది. తమిళ ఇండస్ట్రీలో కెరీర్ ప్రారంభించిన సిల్క్ స్మిత.. ఆ తరువాత తెలుగు మలయాళ కన్నడ హిందీ భాషల్లో 450 కి పైగా చిత్రాల్లో నటించింది మరియు నర్తించింది. నిర్మాతలకు కాసుల వర్షాన్ని కురిపించింది. అగ్ర హీరోలు సైతం తన డేట్స్ కోసం ఎదురు చూసేలా చేసింది. ఒకానొక స‌మ‌యంలో స్టార్ హీరో హీరోయిన్లను మించి రెమ్యునరేషన్ తీసుకుని లేడీ సూప‌ర్ స్టార్‌గా అవ‌త‌రించింది.
అప్పట్లో ప్రతి సినిమాలో సిల్క్ స్మిత చేత స్పెషల్ సాంగ్ చేయించేవారు. అసలు సిల్క్ లేకపోతే సినిమాను కొనడానికి డిస్ట్రిబ్యూటర్ సైతం ముందుకు వచ్చేవారు కాదు. ఆ రేంజ్ లో సిల్క్ స్మిత క్రేజ్ సంపాదించుకుంది. అప్పట్లో సిల్క్ స్మిత‌కు అభిమానుల క‌న్నా ఆమెను ఆరాధించే భక్తులు ఎక్కువ‌గా ఉండేవారు. కేవ‌లం సిల్క్ స్మిత‌ను చూడ‌టం కోస‌మే థియేట‌ర్స్ కు వచ్చేవారు. అటువంటి సిల్క్ స్మిత 36 ఏళ్ల వయసులోనే తిరిగిరాని లోకాలకు వెళ్లిపోయింది. ప్రేమించిన వాడు మోసం చేయడం, కుటుంబ సభ్యులు అండగా లేకపోవడం, ఒంటరితనం బాధించడంతో ఆత్మహత్య చేసుకుని అర్ధాంతరంగా త‌నువు చాలించింది. సిల్క్ స్మిత చనిపోయి దాదాపు రెండున్నర దశాబ్దాలు అవుతున్నా ఆమె గురించి ఏదో ఒక విషయం తెరపైకి వస్తూనే ఉంది.
అయితే ఒక‌ప్పుడు సిల్క్ స్మిత స‌గం కొరికిన యాపిల్ వేలంపాటలో అమ్ముడైంద‌న్న మీకు తెలుసా..? అవును, మీరు విన్న‌ది నిజ‌మే. 1984 లో ఒక సినిమా షూటింగ్ లో బిజీ ఉన్న సిల్క్ స్మిత విరామ స‌మ‌యంలో ఒక యాపిల్ తిన‌బోయింది. స‌గం కొరికి తింటూ ఉండ‌గా షాట్ రెడీ అని చెప్పి ఆమెను పిలిచారట. దాంతో సిల్క్ యాపిల్ ను అక్క‌డే వ‌దిలేసి వెళ్లిపోయింది. అది గ‌మ‌నించిన సిల్క్ స్మిత మేక‌ప్ మ్యాన్ అక్క‌డిక‌క్క‌డే ఆ యాపిల్ ను తీసుకుని వేలం వేశాడు. సిల్క్ స్మిత స‌గం కొరికిన యాపిల్ వేలంపాటలో ఏకంగా ఓ వ్య‌క్తి రూ. 26 వేలకు కొనుక్కున్నాడ‌ట. 80వ దశకంలో రూ. 26 వేలంటే మామూలు విషయం కాదు. అందువ‌ల్ల ఈ విషయం అప్పట్లో టాక్ ఆఫ్ ద ఇండ‌స్ట్రీగా మారింది. ఏదేమైనా సిల్క్ స్మిత క్రేజ్ కు ఇదొక నిద‌ర్శ‌నం అన‌డంలో ఎటువంటి సందేహం లేదు.