సినిమాల్లో అవకాశం వస్తే తమ టాలెంట్ నిరూపించేందుకు ఎందరో సిద్ధంగా ఉంటారు. ఇందుకు సరైన దారులు ఎంచుకోకపోతే మొదటికే మోసం రావడం ఖాయం. ఇటువంటి మోసానికే పాల్పడ్డాడు ఓ మోసగాడు. కొత్తగా సినిమా తీస్తున్నానని నమ్మించి లక్షల్లో డబ్బులు గుంజాడు. అంతటితో ఆగక అమ్మాయిలను లైంగికంగా వేధించడంతో అతడి ఆగడాలకు అడ్డుకట్ట పడింది.
రావణ భిక్షు అనే వ్యక్తి తనను తాను సినీ పరిశ్రమకు చెందిన వ్యక్తిగా పరిచయం చేసుకున్నాడు. జబర్దస్త్ ప్రోగ్రామ్ లో కెమెరామెన్ గా పని చేసినట్టు చెప్పుకున్నాడు. కొత్తగా సినిమా తీస్తున్నాను.. నటీనటులు కావాలి అని ప్రకటన ఇచ్చాడు. ఇది నమ్మి ఎందరో ఔత్సాహికులు, నటనపై ఆసక్తి ఉన్నవారు భిక్షును కలిశారు. చైతన్య ఆర్ట్స్ పేరుతో బ్యానర్ పై ‘ఆత్రేయపురం ప్రేమకథ’ అనే సినిమా తీస్తున్నట్టు నమ్మించాడు. త్వరలో అమరావతి శైవ క్షేత్రంలో షూటింగ్ ప్రారంభిస్తున్నట్టు తెలిపాడు. ఇందుకు వారి వద్ద నుంచి 30వేల నుంచి వారి స్థోమతను బట్టి డబ్బు వసూలు చేశాడు.
జబర్దస్త్ పేరు చెప్పటంతో నిజమేనని నమ్మి అడిగినంత ఇచ్చారు. వీరిలో అమ్మాయిలు కూడా ఉన్నారు. అయితే.. అమ్మాయిలను లైంగికంగా వేధించడంతో ఇదంతా మోసమని గ్రహించారు. వెంటనే పోలీసులను, మీడియాను సంప్రదించి మోసాన్ని బయటపెట్టారు. భిక్షు మోసానికి బలైపోయిన వారిలో ఎక్కువగా విజయవాడ – గుంటూరుకు చెందిన వారే ఉండటం విశేషం. రంగంలోకి దిగిన పోలీసులు రావణ భిక్షును అరెస్టు చేసి విచారణ చేపట్టారు. జబర్దస్త్ కార్యక్రమంలో భిక్షుకు సంబంధాలున్నాయా.. ఎక్కడైనా మోసాలకు పాల్పడ్డాడా, ఎంతెంత వసలూ చేశాడు.. అనే కోణంలో విచారణ చేస్తున్నారు.