Chandrababu: ఏపీలో ఎన్నికల దగ్గర పడుతుండటంతో అధికార, విపక్ష నేతల మధ్య మాటల యుద్దం కొనసాగుతోంది. సిద్ధం సభల్లో వైసీపీ అధినేత, సీఎం జగన్మోహనరెడ్డి .. చంద్రబాబు, విపక్షాలపైనా, గత చంద్రబాబు పాలనపైనా తీవ్ర స్థాయిలో విమర్శలు, ఆరోపణలు చేస్తుండగా, రా..కదలిరా .. సభల్లో జగన్మోహనరెడ్డి పాలనపై చంద్రబాబు తీవ్ర స్థాయిలో విరుచుకుపడుతున్నారు.
రాప్తాడు సభల్లో జగన్ పంచ్ డైలాగ్ లు వేశారు. ఫ్యాన్ ఎప్పుడూ ఇంట్లో తిరుగుతూ ఉండాలి. సైకిల్ ఎప్పుడూ ఇంటి బయట ఉండాలి. తాగేసిన టీ గ్లాస్ ఎప్పుడూ సింక్ లోనే ఉండాలని జగన్ వ్యాఖ్యానించారు. దీనికి కౌంటర్ చంద్రబాబు ఇవేళ ఎక్స్ (ట్విట్టర్) వేదికగా స్పందిస్తూ.. ఓపెన్ ఛాలంజ్ అంటూ సవాల్ విసిరారు. రెక్కలు ఊడిపోయిన ఫ్యాన్ ని విసిరిపారేయడానికి జనం సిద్ధంగా ఉన్నారని అన్నారు.
జగన్ సర్కార్ కు కౌంట్ డౌన్ ప్రారంభమైందని అన్నారు చంద్రబాబు. అభివృద్ధి పాలన ఎవరిదో..విధ్వంసం ఎవరిదో జనం ముందు చర్చిద్దామన్నారు. దమ్ముంటే తనతో బహిరంగ చర్చకు రావాలని సవాల్ విసిరారు. సామాజిక న్యాయానికి నిలువునా శిలువ వేసి….బాదుడు పాలనతో ప్రజల రక్తం పీల్చేసి….విధ్వంస పోకడలతో రాష్ట్ర భవిష్యత్ ను కూల్చేశారని చంద్రబాబు దయ్యబట్టారు.
ఇప్పుడు ర్యాంప్ వాక్ చేసి అబద్ధాలు చెబితే ప్రజలెలా నమ్ముతారు జగన్ రెడ్డీ? అని ప్రశ్నించారు. జగన్ రెడ్డి ప్రభుత్వానికి కౌంట్ డౌన్ ప్రారంభం అయ్యిందనీ, ఇంకా 50 రోజులే ఉన్నాయన్నారు. వరం ఇచ్చిన శివుడినే బూడిద చేయాలనుకున్న భస్మాసురుడి గతే నీకు పడుతుందని అన్నారు.
‘బూటకపు ప్రసంగాలు కాదు…అభివృద్ది పాలన ఎవరిదో….విధ్వంసం ఎవరిదో జనం ముందు చర్చిద్దాం. దమ్ముంటే నాతో బహిరంగ చర్చకు రా! ప్లేస్, టైం…నువ్వే చెప్పు. ఎక్కడికైనా వస్తా….దేనిమీదైనా చర్చిస్తా. నువ్వు సిద్ధమా జగన్ రెడ్డీ!’ అని చంద్రబాబు సవాల్ విసిరారు. అలానే జగన్ పలు సందర్భాల్లో ఇచ్చిన హామీలకు సంబంధించి వీడియోను చంద్రబాబు పోస్టు చేశారు.
YSRCP: ఫ్యాన్ ఎప్పుడూ ఇంట్లో తిరుగుతూ ఉండాలి – సీఎం జగన్