Russia Ukraine War: రష్యా – ఉక్రెయిన్ మధ్య జరుగుతున్న యుద్ధం నేపథ్యంలో రెండు దేశాల మధ్య నిర్వహించిన చర్చలు విఫలమైయ్యాయి.. అయిదు రోజులుగా ఉక్రెయిన్ పై రష్యా భీకరపోరు సాగిస్తుండగా ఉక్రెయిన్ కూడా తగ్గేదే లే అన్నట్లు దాడులను ఎదుర్కొంటోంది. ఈ తరుణంలో యుద్ధానికి స్వస్తి పలికేందుకు బెలారస్ వేదికగా జరిగిన చర్చల్లో ఇరు దేశాలు తమ తమ వాదనలకే కట్టుబడ్డాయి. ప్రత్యర్ధి వర్గం చేసిన ప్రతిపాదనలను ఇరు దేశాలు పరిగణలోకి తీసుకున్న దాఖలాలు కనబడలేదు. ఈ కారణంగా గంటల తరబడి సాగిన చర్చలు సింగిల్ తీర్మానం కూడా లేకుండానే ముగిశాయి. యుద్ధం మొదలైన రెండో రోజునే ఉక్రెయిన్ తో తాము చర్చలకు సిద్ధం అంటూ రష్యా అధ్యక్షుడు పుతిన్ ప్రతిపాదన చేయడం, బెలారస్ వేదికగా ఉక్రెయిన్ చర్చలకు సిద్ధమైతే తమ దేశ ప్రతినిధి బృందాన్ని పంపుతామని వెల్లడించిన సంగతి తెలిసిందే.
Russia Ukraine War: మూడు గంటలకు పైగా చర్చలు జరిగినా..
రష్యా మిత్రదేశంగా ఉన్న బెలారస్ లో చర్చలకు తొలుత ఉక్రెయిన్ అధ్యక్షుడు జెలెన్ స్కీ విముఖత వ్యక్తం చేసినా తరువాత చర్చలకు ఓకే చెప్పారు. ఈ నేపథ్యంలో బెలారస్ లో నేడు మొదలైన చర్చలకు ఉక్రెయిన్ నుండి ఆరుగురు, రష్యా నుండి అయిదుగురు విదేశాంగ ప్రతినిధులతో కూడిన బృందాలు కూర్చున్నాయి. దాదాపు మూడు గంటలకు పైగా చర్చలు జరిగినా ఏ ఒక్క తీర్మానం లేకుండానే రెండు దేశాలు చర్చలను ముగించాయి. ప్రపంచ దేశాలన్నీ శాంతియుత పరిష్కారం కోరుకుంటున్న తరుణంలో చర్చలకు రెండు దేశాలు అంగీకరించడంతో సమస్య పరిష్కారం అవుతుందని భావించారు. చర్చలు ఫలప్రదం అయి యుద్ధం ముగిస్తే ఉక్రెయిన్ ప్రజలతో పాటు ప్రపంచ దేశాలు కూడా ఊపిరిపీల్చుకునే అవకాశం లభించేది.
Russia Ukraine War: ఈయూలో సభ్యత్వంకు జెలెన్ స్కీ డిమాండ్
ఇదిలా ఉంటే ఉక్రెయిన్ అధ్యక్షుడు జెలెన్ స్కీ కొత్త డిమాండ్ ను తెరపైకి తీసుకువచ్చారు. తమకు యూరోపియన్ యూనియన్ (ఈయూ)లో సభ్యత్వం ఇవ్వాలని డిమాండ్ చేశారు. యూరోపియన్లందరితో కలిసి ఉండాలన్నదే తమ లక్ష్యమని పేర్కొన్నారు. ఇది మా న్యాయమైన హక్కు, ఇది సాధ్యమవుతుందని భావిస్తున్నానని ఆయన పేర్కొన్నారు. మరో పక్క ఉక్రెయిన్ అండగా యూరోపియన్ యూనియన్ దేశాలు నిలవాలని నిర్ణయించుకోవడంతో పాటు యుద్ద విమానాలు పంపాలని నిర్ణయించిన సంగతి తెలిసిందే.
36 దేశాల విమానాలపై రష్యా నిషేదం
మరో పక్క రష్యా పాశ్చాత్య దేశాల హెచ్చరికలను ఏ మాత్రం ఖాతరు చేయడం లేదు. అమెరికాతో పాటు యూరోపియన్ యూనియన్, నాటో కూటమి దేశాలు రష్యాపై ఆర్ధికరమైన ఆంక్షలు విధించిన నేపథ్యంలో కాస్తంత తగ్గినట్లే కనిపించినా తాజాగా అధినేత పుతిన్ కీలక నిర్ణయాన్ని తీసుకున్నారు. తమ దేశంపై ఆంక్షలు విధించిన దేశాల్లోని మెజార్టీ దేశాల విమానాలు రష్యా గగనతలంపై ఎగరకుండా నిషేదం విధించారు. రష్యా 36 దేశాల విమానాలపై నిషేదం విధించింది. రష్యా నిషేదం విధించిన దేశాల్లో బ్రిటన్, జర్మనీ, ఆస్ట్రియా, ఆల్బేనియం, బెల్జియం, బల్గేరియా, హాంగేరీ, డెన్మార్క్, ఐర్లాండ్, స్పెయిన్, ఇటలీ, కెనడా, లాధ్వియా, లిథువేనియా, అక్సెంబర్గ్, రోమేనియా, ఫిన్లాండ్, ఫ్రాన్స్, క్రోయేషియా, స్వీడన్, ఎస్టోనియా తదితర దేశాలు ఉన్నాయి.