151 సీట్లతో అత్యంత బలమైన పార్టీగా అవతరించి అధికారంలోకి వచ్చిన వైసీపీలో చీలికలు సాధ్యమేనా? అలాంటి అవకాశాలు ఇప్పుడు ఉన్నాయా? అసలు ఆ ఛాన్స్ ప్రస్తుత ఏపీ రాజకీయాల్లో ఉందా? ప్రతిపక్షాలు అత్యంత బలహీనంగా ఉన్న ఈ పరిస్థితుల్లో అలాంటి ఆలోచనలు రావడం కరెక్టేనా? ఆ ప్రశ్నలన్నింటికీ “అవును” అనే సమాధానమే వస్తుందట టీడీపీ నుంచి! ప్రస్తుతం వైకాపా లో అసంతృప్తిని క్యాష్ చేసుకోవాలనే ఆలోచనలో ఉన్న టీడీపీ.. ఆ దిశగా పావులు కదపడానికి ప్లాన్ చేస్తుందట!
భారీ విక్టరీ సాధించిన వైకాపా జయజయధ్వానాలు ఇంకా మారుమోగుతూనే ఉన్న ఈ దశలో.. ఆ పార్టీలో చీలిక సాధ్యమేనా అంటే… రాజకీయాల్లో, అది కూడా బాబు మార్కు రాజకీయాల్లో అన్నీ సాధ్యమే అనే మాట వినబడుతుంది. ప్రస్తుతం వైకాపాలో ఉన్న అసంతృప్తి పెద్దదేమీ కాదని, ఆ మాత్రం అసంతృప్తి ఏపార్టీలో అయినా ఉంటాదని.. పసుపు పత్రికల్లో చూడటం వల్ల అది పెద్దగా కనిపిస్తుంది కానీ, అక్కడ టీడీపీ కలలుగనేటంత సమస్య లేదని వైకాపా నేతలు చెబుతున్నారు!
వారి వాదన అలా ఉంటే… టీడీపీ మాత్రం ఆ దిశగా అడుగులు వేస్తుందట. అక్కడున్నది చంద్రబాబు.. అపర రాజకీయ చాణిక్యుడు.. జుట్టూ, కాళ్లు ఏదైనా పట్టుకోగల సమర్ధుడు.. అధికారంలో ఉన్నా, ప్రతిపక్షంలో ఉన్నా ఎమ్మెల్యేలకు వారి వారి బలహీనతలమేర రేట్లు ఫిక్స్ చేయడంలో దిట్ట.. అని ఒకవైపు కామెంట్లు వినిపిస్తున్నాయి. మరోవైపు ఈ ప్రభుత్వం ఎప్పుడైనా కూలిపోవచ్చు అని బాలయ్య జోస్యం చెప్పడం.. ఉట్టిగానే అన్న మాట కాదని అంటున్నారు టీడీపీ నేతలు! అంటే… బాబు అప్పుడే ఆదిశగా ప్రయాణం మొదలుపెట్టేశారన్నమాట!
