ఇస్రో ప్రతిష్టాత్మకంగా చేపట్టిన ‘చంద్రయాన్-3’ ప్రయోగం తుది ఘట్టానికి చేరుకుంది. రాబోయే సమస్యలను ముందస్తుగానే అంచనా వేసి చంద్రయాన్-3 ప్రయోగాన్ని డిజైన్ చేసింది. రష్యా ప్రయోగించిన లూనా-25 ల్యాండర్ చంద్రుడిపై చివరి నిమిషంలో కూలిపోవడంతో ఇస్రో శాస్త్రవేత్తలు కీలక ప్రకటన చేశారు. ల్యాండర్ మాడ్యూల్‌కు సంబంధించి ప్రతికూలతలు ఎదురైనప్పుడు ల్యాండింగ్ తేదీని మార్చేస్తామని చెప్పారు. ఆగస్టు 27న విక్రమ్ ల్యాండర్ సాఫ్ట్ ల్యాండింగ్ కోసం ప్రయత్నిస్తామన్నారు. ప్రస్తుత ప్రణాళిక ప్రకారం.. ఆగస్టు 23వ తేదీ (బుధవారం) సాయంత్రం 6:04 గంటలకు చంద్రుడి దక్షిణ ధృవంపై విక్రమ్ దిగేందుకు ముహూర్తం ఖరారైంది.
అంతా అనుకున్నట్లు జరిగితే భారత అంతరిక్ష పరిశోధన చరిత్రలో చంద్రయాన్-3 ప్రయోగం కీలక మైలురాయిగా నిలుస్తుంది. ఈ ప్రయోగం విజయవంతం అయిన తర్వాత స్పేస్ సైన్స్‌పై చాలా మందిలో ఆసక్తి పెరిగే అవకాశాలు ఉన్నాయి. ఈ ప్రయోగం విజయవంతం అయితే భారత ఖ్యాతి మరింతగా పెరుగుతుంది. చంద్రుడిపై ఉండే చిత్రాలు, వీడియోలు, ఇతర దృష్యాలను మనం చూడవచ్చు. అయితే ఈ స్పేస్ క్రాఫ్ట్ చుట్టూ బంగారు రంగులో కవరింగ్ చేస్తారు. అయితే ఆ బంగారు రంగు కవరింగ్ ఎందుకు పూస్తారు? దాని వల్ల ఉపయోగాలేమిటీ? తదితర విషయాల గురించి తెలుసుకుందాం..
బంగారు రంగులో కనిపించే ఆ లేయర్ బంగారం కాదు. అలా అని ఫోయిల్ కూడా కాదు.స్పేస్ క్రాఫ్ట్‌లు, శాటిలైట్‌లపై బంగారు రంగులో చుట్టినట్లు కనిపించే దాన్ని ‘మల్టీ లేయర్ ఇన్సులేషన్’ అంటారు. ఇది ఉష్ణ నిరోధంగా పని చేస్తుంది. ఈ ఫిల్మ్‌ను అనేక పొరలుగా స్పేస్ క్రాఫ్ట్‌లు, శాటిలైట్‌లపై చుడతారు. అయితే పైన కనిపించే పొర బంగారు రంగులో ఉన్నప్పటికీ లోపల తెలుపు, వెండి రంగుల్లో ఉంటుంది.
ఈ బంగారు రంగు ఫిల్మ్‌ను దేనితో తయారు చేస్తారు?
ఈ బంగారు రంగు ఫిల్మ్‌ను ‘పాలిస్టర్’తో తయారు చేస్తారు. దానిపైన అత్యంత పలుచని అల్యూమినియం పొర ఉంటుంది. స్పేస్ క్రాఫ్ట్ మొత్తాన్ని ఈ బంగారు రంగు ఫిల్మ్ చుట్టరు. కేవలం రేడియేషన్‌కు గురయ్యే ప్రాంతాల్లో, పాడవ్వడానికి అవకాశం ఎక్కువగా ఉండే భాగాల్లో మాత్రమే ఈ బంగారు ఫిల్మ్‌తో కవర్ చేస్తారు. స్పేస్ క్రాఫ్ట్, శాటిలైట్‌లలో ఎన్ని సున్నిత భాగాలు ఉన్నాయో గుర్తించి.. దానికి తగ్గట్లు బంగారు రంగు ఫిల్మ్‌ను తయారు చేస్తారు.
ఉష్ణోగ్రతను తట్టుకునేలా..
భూమి నుంచి అంతరిక్షంలో ప్రయాణించేటప్పుడు ఉష్ణోగ్రతలు మారుతుంటాయి. స్పేస్ క్రాఫ్ట్, శాటిలైట్‌లలో ఉండే సున్నితమైన పరికరాలు దెబ్బతినే అవకాశం ఉంటుంది. వాతావరణంలో వచ్చే హఠాత్తు మార్పులకు పరికరాలు పని చేయకుండా పోతాయి. ఇలాంటి పరిణామాలు చోటు చేసుకున్నప్పుడు.. అందులోనుంచి బయట పడేందుకు ఉష్ణమాపక పొరలతో పరికరాలను కప్పి ఉంచుతారు.
నేషనల్ ఎన్విరాన్‌మెంటల్ శాటిలైట్ డాటా ప్రకారం..
స్పేస్ క్రాఫ్ట్స్‌ను ఉష్ణమాపక పొరలతో కప్పడానికి సంబంధించిన పూర్తి సమాచారాన్ని అమెరికా ‘నేషనల్ ఎన్విరాన్‌మెంటల్ శాటిలైట్ డేటా, ఇన్ఫర్మేషన్ సర్వీస్’లో పొందుపర్చింది. దీని ప్రకారం.. స్పేస్ క్రాఫ్ట్, శాటిలైట్‌లు ఎంత వరకు ఉష్ణోగ్రతను ఎదుర్కొంటాయే అంచనా వేసి మల్టీ లేయర్ ఇన్సులేషన్ షీట్లను తయారు చేస్తారు. -200 డిగ్రీల సెంటీగ్రేడ్ నుంచి -300 డిగ్రీల సెంటీగ్రేడ్ ఉష్ణోగ్రత నుంచి ఈ లేయర్ రక్షణ కల్పిస్తుంది. రేడియేషన్, ఉష్ణోగ్రత, అంతరిక్షంలోని దుమ్ము ధూళి నుంచి స్పేస్ క్రాఫ్ట్, శాటిలైట్‌లకు రక్షణ కల్పిస్తుంది.