Chrome 100 version: 2008వ సంవత్సరంలో లాంచ్ అయిన గూగుల్ క్రోమ్ ఇప్పుడు ప్రతి ఒక్కరి ఫేవరెట్ బ్రౌజర్ గా మారిపోయింది. వచ్చే ఏడాది గూగుల్ 100 వెర్షన్ రాబోతోంది. అయితే ఈ వెర్షన్ కారణంగా చాలా వెబ్ సైట్లు క్రోమ్ బ్రౌజర్లో వర్క్ కాకపోవచ్చని టెక్ నిపుణులు చెబుతున్నారు. 2022, మార్చి నెలలో క్రోమ్ 100 వెర్షన్ను గూగుల్ విడుదల చేయాలని యోచిస్తోంది. ఈ వెర్షన్ అందుబాటులోకి రాగానే యూజర్లు పాత వెబ్సైట్లను యాక్సెస్ చేయడంలో ఇబ్బందులు ఎదుర్కొంటారట. ఇందుకు గూగుల్ క్రోమ్ వెర్షన్ డబుల్ డిజిట్ నుంచి త్రిబుల్ డిజిట్ కు మారడమే కారణమని టెక్నాలజీ నిపుణులు వివరిస్తున్నారు. 2000లో కంప్యూటర్లలో తలెత్తిన సాంకేతిక సమస్య లాగా 2022లో క్రోమ్ బ్రౌజర్ లో సమస్యలు తలెత్తే అవకాశం ఉందంటున్నారు.
గూగుల్ క్రోమ్ పని ఖతం
వెర్షన్ అంకెలు పెరగడంతో కొన్ని రకాల వెబ్సైట్లు గూగుల్ క్రోమ్ లో సక్రమంగా పని చేయని ఫోర్బ్స్ పేర్కొంది. ఈ సమస్య ఎదుర్కోవడం తప్పదని గూగుల్ కూడా ఒప్పుకుంది. కాకపోతే సాధ్యమైనంత వరకు యూజర్లు ఇబ్బందులు పడకుండా రిలీజ్కు ముందే సమస్యలను పరిష్కరిస్తామని భరోసా ఇస్తోంది. వర్క్ కాని వెబ్సైట్లలో ప్రధానంగా డ్యూడ్ ప్లాట్ఫాంపై అభివృద్ధి చెందే వెబ్సైట్లే ఉండనున్నాయి. క్రోమ్-100 తర్వాతి వెర్షన్లలో ఇవి పనిచేయవు. వర్డ్ప్రెస్, పీహెచ్పీ వంటి కంటెంట్ మేనేజ్మెంట్ సిస్టమ్లకు ఎలాంటి సమస్య ఉండకపోవచ్చని నిపుణులు చెబుతున్నారు. కానీ కొన్ని వెబ్సైట్లు పనిచేసి మరికొన్ని పని చేయకపోతే చాలా మంది గూగుల్ క్రోమ్ ని పూర్తిగా పక్కన పెట్టేసే ప్రమాదముంది. దాంతో దాని పని ఖతం అయ్యే అవకాశాలు కూడా ఎక్కువేనని టెక్ నిపుణులు విశ్లేషిస్తున్నారు.
ముందు జాగ్రత్త పడుతున్న గూగుల్
ఏయే వెబ్సైట్లలో సమస్యలు తలెత్తుతాయో ముందుగానే తెలుసుకుని ఆ ప్రాబ్లమ్స్ సాల్వ్ చేసే దిశగా ప్రస్తుతం పరిశోధనలు జరుగుతున్నాయి. ఈ సమస్య కారణంగా క్రోమ్ యూజర్లు ఫైర్ఫాక్స్, మైక్రోసాఫ్ట్ ఎడ్జ్ వంటి బ్రౌజర్లకు ఆకర్షితులయ్యే అవకాశం ఉంది. అందుకే గూగుల్ ఎలాంటి సమస్యలు ఉత్పన్నమవ్వకుండా ముందస్తుగా జాగ్రత్తలు తీసుకోవడం చాలా ముఖ్యం. ప్రస్తుతానికైతే ఆ దిశగా గూగుల్ చర్యలు చేపడుతోంది. ఈ సమస్యని గూగుల్ అధిగమిస్తుందా లేదా అనేది తెలియాల్సి ఉంది.