కరోనా దెబ్బకి కుదేలైపోయిన వ్యవస్థల్లో సినీ పరిశ్రమ కూడా ఉంది. రోజువారీ ఉపాధిపై ఆధారపడిన వర్కర్స్, టెక్నీషియన్స్.. ఎందరో షూటింగ్స్ లేక ఇబ్బందులు పడుతున్నారు. భారతదేశంలోని ప్రతి భాషా పరిశ్రమలోనూ ఇదే పరిస్థితి నెలకొంది. ప్రభుత్వాలు షూటింగ్స్ కు అనుమతి ఇచ్చినా కరోనా విలయతాండవంతో ముందుకు వెళ్లలేని పరిస్థితి. ఇందుకు బాలీవుడ్ కూడా మినహాయింపు కాలేదు. బాలీవుడ్ స్టార్ హీరో హృతిక్ రోషన్ హిందీ సినీ వర్కర్లకు గతంలో సాయం చేసిన సంగతి తెలిసిందే. లాక్ డౌన్ సమయంలో అక్షయ పాత్ర ఫౌండేషన్ ద్వారా రోజువారీ కూలీలకు, అండ కోల్పోయిన వృద్ధులకు భోజన సదుపాయం కల్పించాడు. ఇప్పుడు మరోసారి తన పెద్ద మనసు చాటుకుంటున్నాడు.
ప్రస్తుత సమయంలో ఆర్ధికంగా ఇబ్బందిపడుతున్న 100 మంది బ్యాక్ గ్రౌండ్ డ్యాన్సర్ల కుటుంబాలకు అండగా నిలిచాడు. వారి అవసరాల నిమిత్తం బ్యాంక్ అకౌంట్లో నగదు జమ చేశాడు. ఈ విషయాన్ని బాలీవుడ్ డ్యాన్సర్స్ కో ఆర్డినేటర్ రాజు సురానీ తెలిపారు. కష్టకాలంలో ఆదుకుని హృతిక్ చేసిన సాయానికి డ్యాన్సర్స్ సంఘం కృతజ్ఞతలు తెలిపింది. బాలీవుడ్ లో కూడా ఇప్పట్లో షూటింగ్స్ చేసే పరిస్థితులు లేవు. ఏకంగా అమితాబ్ కుటుంబమే వైరస్ బారిన పడటం నిజంగా షాక్. దీంతో షూటింగ్ జరపాలని భావించిన సినిమా, సీరీయల్స్ నిర్మాతలు దర్శకులు వెనక్కు తగ్గారు. పరిస్థితులు చక్కబడ్డాకే వీరంతా షూటింగ్స్ కు వెళ్లే అవకాశం ఉంది.