ఏ వాహనాన్ని నడపాలన్నా డ్రైవర్ తప్పనిసరి. కార్ ల వరకూ ఆటోమేటెడ్ వి, డ్రైవర్ అవసరం లేనివి కొన్ని వచ్చాయి కానీ వాటిని వాడుతున్న వారు చాలా తక్కువే. ఇక ట్రాక్టర్ లకు అయితే ఇది కచ్చితంగా రాలేదు. డ్రైవర్ తప్పనిసరి. అయితే డ్రైవర్ లేకుండానే ట్రాక్టర్ ఆగకుండా బంతి ఆకారంలో తిరుగుతూనే ఉంది.
ఇది ఏదో కొన్ని సెకన్ల పాటు జరిగితే ఏమో అనుకోవచ్చు కానీ కొన్ని నిమిషాల పాటు ఎవరూ లేకపోయినా కానీ ట్రాక్టర్ అలా తిరుగుతుండడంతో ప్రజలు భయాందోళనలకు గురయ్యారు. ఈ సంఘటన వరంగల్ రూరల్ జిల్లా ఓగ్లాపూర్ లో చోటు చేసుకుంది. ఇదే గ్రామానికి చెందిన రైతు ట్రాక్టర్ పై వెళుతున్న సమయంలో ఒక్కసారిగా టైర్ పంక్చర్ అయినట్లుగా పెద్ద శబ్దం వచ్చింది. దాంతో ఆ రైతు ట్రాక్టర్ పై నుండి దూకేసాడు. ఇక అక్కడి నుండి ఆ ట్రాక్టర్ ఆగకుండా పంటపొలాల్లోకి దూసుకెళ్లింది. అంతటితో ఆగకుండా అతివేగంగా తిరగడం మొదలుపెట్టింది. ఈ సడెన్ సంఘటనతో ప్రజలు ఆశ్చర్యపోయి చూస్తుండిపోయారు.
అందరూ చూస్తుండగానే అది బంతి ఆకారంలో గిర్రుగిర్రున తిరగడం మొదలుపెట్టింది. అయితే అదే సమయంలో ఏటూరు నాగారం మండలం రొయ్యూరు గ్రామానికి చెందిన మాజీ సర్పంచ్ దేవులపల్లి విజయ్ కుమార్ అటుగా వెళ్తూ ఈ సంఘటనను చూసి ఆగారు. పంటపొలాలు, పక్కనే ఇళ్ళు ఉండడంతో ప్రమాదాన్ని ఊహించి ధైర్యం చేసి ట్రాక్టర్ వెనుకే పరిగెత్తి దాని మీదకెక్కి బ్రేక్ వేసి దాన్ని ఆపడంతో స్థానికులు ఊపిరి పీల్చుకున్నారు. మాజీ సర్పంచ్ ధైర్య సాహసాలకు అక్కడున్న వారు మెచ్చుకోకుండా ఉండలేకపోయారు.
