Fire Accident: హైదరాబాద్ పంజాగుట్టలోని ఓ అపార్ట్ మెంట్ లో భారీ అగ్ని ప్రమాదం సంభవించింది. విద్యుత్ షార్ట్ సర్క్యూట్ కారణంగా భవనంలోని అయిదు, ఆరు అంతస్తుల్లో మంటలు చెలరేగాయి. సమాచారం అందుకున్న పోలీసులు ఘటనా స్థలానికి చేరుకుని అపార్ట్ మెంట్ లో ఉన్న వారందరినీ బయటకు తరలించారు. ఆరో అంతస్తులో చిక్కుకున్న అయిదుగురిని పోలీసులు రక్షించారు. అగ్నిమాపక సిబ్బంది సంఘటనా స్థలానికి చేరుకుని మంటలను అదుపు చేశారు. 
ఈ అగ్నిప్రమాదంలో ఎటువంటి ప్రాణనష్టం లేదా గాయపడటం జరగలేదని పోలీసు అధికారి తెలిపారు. మంటలు అదుపులోకి వచ్చాయనీ, ఎటువంటి ప్రాణనష్టం జరగలేదని హైదరాబాద్ జిల్లా అగ్నిమాపక అధికారి శ్రీనివాసరెడ్డి తెలిపారు. అపార్ట్ మెంట్ నుండి దట్టమైన పొగలు, మంటలు ఎగిసిపడుతున్న వీడియో సోషల్ మీడియాలో వైరల్ అయ్యింది. ప్రమాదానికి సంబంధించి పూర్తి వివరాలు తెలియాల్సి ఉంది. ప్రమాదంలో ప్రాణనష్టం ఏమీ జరగకపోవడంతో అందరూ ఊపిరిపీల్చుకున్నారు.