హైదరాబాద్ : ప్రజల్లో కరోనాపై ఉన్న భయం ప్రైవేట్ ఆసుపత్రులకు వరంగా మారుతోంది. కరోనా పేషెంట్స్ కు కార్పొరేట్ ఆసుపత్రుల నిర్వాహకులు ఇస్తున్న బిల్లులు చూస్తేనే సామాన్య, మధ్య తరగతి వర్గాలకు గుండె పోటు వచ్చే పరిస్థితి ఉందని అంటున్నారు. ఇటీవల హైదరాబాద్ లో ఒ కరోనా పేషెంట్ కు ట్రీట్మెంట్ చేసినందుకు అక్షరాలా మూడు లక్షల 40 వేల రూపాయలు ఛార్జ్ చేసిన విషయం తెలిసిందే.
తెలంగాణా ప్రభుత్వం కరోనా చికిత్సకు ప్రయివేట్ ఆసుపత్రులకు అనుమతులు ఇచ్చిన విషయం తెలిసిందే. అయితే ఫీజుల వసూలుకు సంబంధించి ప్రభుత్వం మార్గదర్శకాలు జారీ చేసినప్పటికీ ప్రయివేట్ ఆసుపత్రుల యాజమాన్యాలు వారి ఇస్తాను రీతిలో ఫీజు వసూలు చేస్తున్నాయనే ఆరోపణలు పెద్ద ఎత్తున వస్తున్నాయి. పీపీఈ కిట్లు, ఎమర్జెన్సీ వైద్యం పేరిట భారీగా వసూళ్లు చేస్తున్నాయని వార్తలు వస్తున్నాయి. కరోనా పేషెంట్స్ పట్ల పలు కార్పొరేట్ ఆసుపత్రులు వ్యవహరిస్తున్న తీరు వివాదాస్పదం అవుతున్నాయి. ఒ పేషెంట్ విషయంలో మంత్రలు కేటీఆర్, ఈటెల రాజేంద్రలు జోక్యం చేసుకొని షటిల్ చేయాల్సిన పరిస్థితి కూడా వచ్చింది.
మనోజ్ కొఠారి (47) అనే వ్యక్తితో పాటు అతడి తల్లి, సోదరుడు కరోనాతో ఇటీవల హైదరాబాద్ నగరంలోని ఒక ప్రైవేట్ లో చేరారు. జూన్ 28 నాటికి ఆయన కోవిడ్ నుంచి కోలుకున్నారు. మనోజ్ కుటుంబానికి ఇన్సూరెన్స్ ఉండటంతో ఆసుపత్రి వర్గాలు ముందుగా డబ్బులు కట్టించుకోలేదు. అయితే డిశ్చార్జ్ సమయంలో మనోజ్ 4.2 లక్షల రూపాయలు చెల్లించాలంటూ ఆసుపత్రి యాజమాన్యం బిల్లు ఇచ్చింది. ఇన్సూరెన్స్ కంపెనీ కేవలం లక్షా 23 వేల రూపాయలకు మాత్రమే క్లెయిమ్‌ అప్రూవల్ ఇచ్చినందున మిగిలిన సొమ్ము చెల్లించాల్సిందేననీ ఆసుపత్రి వర్గాలు పట్టుపట్టాయి. అయితే మంత్రి కేటీఆర్, ఆరోగ్య శాఖ మంత్రి ఈటల రాజేందర్ జోక్యం చేసుకోవడంతో ఈ వ్యవహారం సద్దు మనగడంతో శనివారం ఆయన ఆసుపత్రి నుంచి డిశ్చార్జ్ అయ్యారు.
తాజాగా ఓ ప్రభుత్వ ఆసుపత్రి వైద్యురాలు కరోనాతో ప్రైవేట్ ఆసుపత్రిలో చేరగా 24 గంటలకే లక్షా 15 వేల రూపాయలు కట్టాలని చెప్పారు. ఆమె తాను వైద్యురాలినే, ఇంత బిల్లు వేశారు ఏమిటి అని నిలదీయగా ఆమెను డిశ్చార్జ్ చేయకుండా నిర్బంధించారు. దీనితో ఆమె ఈ ప్రైవేట్ ఆసుపత్రిలో పడుతున్న ఇబ్బందిని తెలియజేస్తూ సెల్ఫీ వీడియోను సోషల్ మీడియా పోస్ట్ చేశారు. దీనితో ఆమెను ఆదివారం తెల్లవారుజామున డిశ్చార్జ్ చేశారు.
కరోనా విపత్కర పరిస్థితులను ఆసరాగా చేసుకొని పలు కార్పొరేట్ ఆసుపత్రులు పేషెంట్ల నుంచి భారీ మొత్తంలో డబ్బులు వసూలు చేస్తున్నారు అనడానికి ఇవి ఉదాహరణ లుగా నిలుస్తున్నాయి.