కర్ణాటక అసెంబ్లీ ఎన్నికల పోలింగ్ ముగిసింది. మరో మూడు రోజుల్లో ఫలితాలు వెలువడనున్నాయి. ఇటు పోలింగ్ పూర్తి కాగానే మెజార్టీ మీడియా, సర్వే సంస్థలు ఎగ్జిట్ పోల్స్ ఫలితాలు వెల్లడించాయి. అయితే ఎన్నికల్లో ఏ పార్టీకి స్పష్టమైన మెజార్టీ వచ్చే అవకాశం లేదని ఎగ్జిట్ పోల్స్ అంచనా వేశాయి. కాంగ్రెస్ పార్టీ అతి పెద్ద పార్టీగా అవతరిస్తుందని పలు సర్వే సంస్థలు చెబుతున్నాయి. రెండో స్థానంలో బీజేపీ, మూడో స్థానంలో జేడీఎస్ నిలుస్తాయని పేర్కొన్నాయి. మ్యాజిక్ ఫిగర్ రాకపోతే మళ్లీ కుమార స్వామి కింగ్ మేకర్ అవుతారనీ, తద్వారా ముఖ్యమంత్రిగా మూడో సారి ప్రమాణ స్వీకారం చేసే అవకాశం లేకపోలేదని అంటున్నారు.
కాంగ్రెస్ కు 94 నుండి 108 మధ్య సీట్లు వస్తాయని రిపబ్లిక్ పీ – మార్క్ ఎగ్జిట్ పోల్ అంచనా వేసింది. బీజేపీకి 85 నుండి 100 వస్తాయని పేర్కొంది. జేడీఎస్ కు గరిష్టంగా 32 స్థానాలు రావచ్చని లెక్కగట్టింది. న్యూస్ నేషన్ సీజీఎస్ ఎగ్జిట్ పోల్ మాత్రం 114 స్థానాలతో బీజేపీ అతి పెద్ద పార్టీగా నిలుస్తుందని తెలిపింది. కాంగ్రెస్ కు 86 స్థానాల్లో, జేడీఎస్ 21 స్థానాల్లో విజయం సాధించే అవకాశం ఉందని అంచనా వేసింది. సువర్ణ న్యూస్ – జన్ కీ బాద్ ఎగ్జిట్ పోల్స్ బీజేపీకి 94 నుండి 117 స్థానాలు వచ్చే అవకాశం ఉందని తెలిపింది. కాంగ్రెస్ కు 91 నుండి 106 స్థానాలు, జేడీఎస్ కు 14 నుండి 24 స్థానాలు రావచ్చని అంచనా వేసింది.
కర్ణాటక అసెంబ్లీలో 224 స్థానాలు ఉండగా, అధికారం చేపట్టాలంటే 113 స్థానాలు అవసరం అవుతాయి. 2018 ఎన్నికల్లోనూ రాష్ట్రంలో హంగ్ ఏర్పడింది. బీజేపీకి 104 స్థానాలు గెలుచుకుని అతి పెద్ద పార్టీగా అవతరించింది కాంగ్రెస్ 80 స్థానాలతో రెండో స్థానంలో నిలిచింది. జేడీఎస్ 37 స్థానాల్లో గెలిచింది. ఏ పార్టీకి మెజార్టీ రానందున చివరకు కాంగ్రెస్, జేడీఎస్ కలిసి ప్రభుత్వాన్ని ఏర్పాటు చేశాయి. అయితే ఆ ప్రభుత్వం ఎంతో కాలం నిలవలేదు. దాదాపు ఏడాదిన్నర పాటు కుమార స్వామి సీఎంగా వ్యవహరించారు. తర్వాత బీజేపీ అధికారం చేపట్టింది.
అంతకు ముందు బీజేపీ వాళ్లు ఆయనకు ఒక సారి రెండున్నరేళ్ల పాటు సీఎం సీట్లో కూర్చోబెట్టారు. ప్రస్తుతం విడుదలైన ఎగ్జిట్ పోల్స్ ను బట్టి చూస్తే కుమారస్వామి మరో సారి నక్కతోక తొక్కినట్లేనా అన్న మాట వినబడుతోంది. మెజార్టీ ఎగ్జిట్ పోల్స్ అంచనాలు నిజమైతే కుమారస్వామి హవా మరి కొంత కాలం కొనసాగే అవకాశం ఉంటుంది అని చెప్పవచ్చు.
Pawan Kalyan: దెబ్బతిన్న పంటలను పరిశీలించి రైతులను పరామర్శించిన జనసేన అధినేత పవన్ కళ్యాణ్