Guinness Record: దేశంలో గానీ ప్రపంచంలో గానీ ఎవరూ చేయని, చేయలేని పనులు చేస్తే వారు ఆ రంగంలో రికార్డు సృష్టించినట్లు అవుతుంది. అదే కోవలో అత్యధిక పెళ్లిళ్లు చేసుకుని కూడా వీరు రికార్డు నెలకొల్పారు. పురుషుల్లో మిజోరాంకు చెందిన జియోనా చానా (76) 38 పెళ్లిళ్లు చేసుకుని రికార్డు నెలకొల్పగా మహిళల్లో లిండా ఉన్నారు.
జియోనా చానా ఇటీవల మృతి చెందగా మిజోరాం ముఖ్యమంత్రి కూడా సంతాపం తెలిపారు. జియోనా చానాకు 38 మంది భార్యలు, 89 మంది పిల్లలు, మనుమలు, మనువరాళ్లు,కోడళ్లు మొత్తం కలిపి కుటుంబ సభ్యుల సంఖ్య 160 మంది పైగానే ఉన్నారు. ప్రపంచంలో అతి పెద్ద కుటుంబం కల్గిన వ్యక్తిగా జియోనా చానా రికార్డు సృష్టించి పాపులర్ అయ్యారు. జియోనా చానా గురించి డాక్యుమెంటరీలు కూడా వచ్చాయి. పురుషుల్లో ఇన్ని పెళ్లిళ్లు చేసుకుని జియోనా చానా రికార్డు సృష్టించగా అత్యధిక వివాహాలు చేసుకున్న మహిళ ఎవరైనా ఉన్నారా అన్న శోధన ప్రారంభమైంది. మన దేశంలో అయితే అటువంటి మహిళ లేదు కానీ అమెరికాలో ఉంది.
లిండా లో టేలర్ వుల్ఫ్ ప్రపంచంలో ఎక్కువ వివాహాలు చేసుకున్న మహిళగా గుర్తింపు పొందింది. ఆమె ఇప్పటి వరకూ 23 మందిని పెళ్లి చేసుకుని ప్రపంచంలో అత్యధిక వివాహాలు చేసుకున్న మహిళగా రికార్డు నమోదు చేసుకున్నారు. ఆమె వివాహాలు చేసుకున్న వారిలో మోసగాళ్లు ఉన్నారు. నేరస్థులు ఉన్నారు. మత బోధకులు, గేలు, సంగీత కళాకారులు ఉన్నారు. ఆమెను కొట్టి హింసించిన వాళ్లు, జీవితంలో ఏమీ లేక ఆమె వద్దనే స్వాంతన పొందిన వారు ఉన్నారు. ఈ క్రమంలోనే అత్యధిక సార్లు పెళ్లి చేసుకున్న మహిళగా గిన్నిస్ రికార్డులోనూ పేరు నమోదు చేసుకుంది ఈ 68 ఏళ్ల బామ్మ.
ఆ వృద్ధురాలు ప్రస్తుతం తన శేష జీవితాన్ని ఆమెరికాలోని ఇండియానా రాష్ట్రంలో గడుపుతోంది. ఆమె చివరి వివాహం 1996లో గ్లిన్ స్కాటీ వుల్ఫ్ అనే వ్యక్తిని వివాహం చేసుకున్నది. గ్లిన్ ను లిండా ప్రేమించి వివాహం అయితే చేసుకోలేదు. కానీ అప్పటికే 28 వివాహాలు చేసుకున్న గ్లిన్ 29వ పెళ్లి చేసుకుని రికార్డు సృష్టించడం కోసం లిండాను పెళ్లి చేసుకున్నారు. పెళ్లయిన ఏడాదికే 1997లో గ్లిన్ చనిపోయాడు. లిండా తొలి వివాహం 1957లో 16 ఏళ్ల వయసులో చేసుకుందట. ఆమె మొదటి భర్త జార్జ్ స్కాట్ వయసు అప్పుడు 31. ఏడు సంవత్సరాల పాటు వారు కాపురం చేశారు. అదే ఆమె జీవితంలో సుదీర్ఘ వైవాహిక జీవితం. మిగిలిన వారు ఎవరూ ఆమెతో ఎక్కువ కాలం వైవాహిక జీవితం కొనసాగించలేదు.