సాధారణంగా ముఖ్యమంత్రులు శాసనసభ్యులై ఉంటారు.అంటే ఎమ్మెల్యేల అన్నమాట.ఒక రాష్ట్రంలో అసెంబ్లీ,శాసనమండలి ఉన్నా కూడా ఎమ్మెల్యేలే సీఎంలవుతుంటారు.ఎమ్మెల్సీలకు అవకాశం తక్కువ.
అనివార్య పరిస్థితుల్లో ఏ సభలోనూ సభ్యుడు కాని వ్యక్తి సీఎం అయితే ఆయన ఆ పదవి చేపట్టిన ఆరు నెలల్లోపు చట్ట సభకు ఎన్నిక కావాల్సి ఉంటుంది.ఈ పరిస్థితుల్లో ఎవరో ఎమ్మెల్యే చేత రాజీనామా చేయించి ఆ స్థానం నుండి సదరు సీఎం గెలిచి వస్తారు.సీఎంగా ఉన్న వ్యక్తి శాసనమండలిని ఎంపిక చేసుకోవడం బహు అరుదు.ఉమ్మడి ఆంధ్రప్రదేశ్లో ఒక భవనం వెంకట్రామ్ మాత్రమే శాసన మండలి సభ్యులుగా ఉండి సీఎం అయ్యారు.ఆరునెలలలోపే ఆయన సీఎం పదవి పోయింది. అయితే దేశంలోని ఒకే ఒక్కరాష్ట్రంలో ఒకే ఒక్క నాయకుడు అసెంబ్లీ ఎన్నికల బరిలోకి దిగకుండా శాసనమండలి సభ్యుని(ఎమ్మెల్సీ) గానే కొనసాగుతూ ఆరుసార్లు ముఖ్యమంత్రి అయ్యారు.ఇప్పటికీ ముఖ్యమంత్రిగానే ఉన్న ఆయనే బీహార్ సీఎం నితీశ్ కుమార్!త్వరలో జరగనున్న బీహార్ అసెంబ్లీ ఎన్నికల లో కూడా నితీష్ పోటీ చేయకపోవడం ఇక్కడ విశేషం.
2005 నుంచి పదిహేను సంవత్సరాలుగా బీహార్‌ను పరిపాలిస్తున్న నితీష్ కుమార్ ఒక్కసారి కూడా అసెంబ్లీకి పోటీ చేయకుండానే ఆరు సార్లు ముఖ్యమంత్రి అయ్యారు.నిజానికి నితీష్ 35 ఏళ్లుగా అసెంబ్లీ ఎన్నికలకు దూరంగా ఉన్నారు. 2004 తర్వాత ఆయన ఏ ప్రత్యక్ష ఎన్నికల్లోనూ పోటీ చేయలేదు.నితీష్ మొదటి సారి 1977 లో నలంద జిల్లాలోని హర్నాట్ అసెంబ్లీ నియోజకవర్గం నుంచి పోటీ చేసి ఓడిపోయారు.1985లో అదే స్థానంలో విజయం సాధించారు.ఆ తర్వాత ఆయన అసెంబ్లీ ఎన్నికల మొఖం చూడలేదు.1989 నుండి ఐదుసార్లు ఎంపీ అయ్యారు.తదుపరి బీహార్ రాష్ట్ర రాజకీయాల్లోకి వచ్చి 2000 వ సంవత్సరంలో తొలిసారి ముఖ్యమంత్రి అయ్యారు అయితే శాసనసభలో మెజారిటీ లేకపోవటంతో ఎనిమిది రోజులకే ప్రభుత్వం కూలిపోయింది.2005 లో బీజేపీతో పొత్తు పెట్టుకొని విజయం సాధించిన నితీష్ ఇక వెనుతిరిగి చూడలేదు.
ఆ రోజు నుంచి ఈరోజు వరకు ఆయనే ముఖ్యమంత్రి..కానీ అసెంబ్లీ ఎన్నికల్లో పోటీ చేయరు.ఎమ్మెల్సీగానే సీఎం కుర్చీపై కూర్చుని ఉంటారు.అదే బిహార్ సిఎం నితీష్ కుమార్ స్పెషాలిటీ.ఈ విషయాన్నే బీహార్ ఎన్నికల ప్రచారంలో మహాకూటమి ముఖ్యమంత్రి అభ్యర్థి తేజస్వి యాదవ్ ఎత్తిచూపుతూ అసెంబ్లీ ఎన్నికల్లో పోటీ చేయలేని సీఎం అంటూ నితీష్ను ఎద్దేవా చేస్తున్నారు.ప్రత్యక్ష ఎన్నికల్లో పోటీ గురించి తనపై వచ్చే విమర్శలను నితీష్ సమర్ధవంతంగానే తిప్పి కొట్టారు. తాను ఏదో ఒక నియోజకవర్గానికి పరిమితం కాదల్చుకోలేదని, అందుకే అసెంబ్లీ ఎన్నికల్లో పోటీ చేయడం లేదని కౌంటర్ ఇచ్చారు.ఏదేమైనా ఒక సీఎం అసెంబ్లీ ఎన్నికల్లో పోటీ చేయకపోవడం అనేది మాత్రం ఆసక్తికరమైన అంశమే!