Hotel Bill : సాధారణంగా మన హోటల్ కి వెళ్లి భోజనం చేస్తే తక్కువలో తక్కువ రెండు వందలు అవుతుంది..! హ.. ఎందుకులే బయటికి వెళ్లి భోజనం చేయటమని ఒకటికి రెండు సార్లు ఆలోచిస్తాం.. ఇక రెస్టారెంట్ కి వెళ్లి భోజనం చేస్తే ఆకలి తీరడం ఏమో కానీ.. బిల్లు కట్టేటప్పుడు మాత్రం ఆకాశంలో ఉన్న చుక్కలు మాత్రం కనిపిస్తాయి..! అయితే ఇలాంటి రోజుల్లో కూడా “కడుపునిండా తిని.. డబ్బులు మాత్రం మీకు తోచినంత ఇవ్వండి” అంటోంది ఓ హోటల్ యజమాని..!! ఈ హోటల్ కథ ఏమిటో ఇప్పుడు తెలుసుకుందాం రండి..!!
సంతృప్తి కి మించిన సంపద ఏముంది..!!
కేరళలోని కొల్లం రైల్వే స్టేషన్ కు రెండు కిలోమీటర్ల దూరంలో యశోదమ్మ హోటల్ అని ఉంది. ఆ హోటల్ లో పని వాళ్ళు ఎవరు ఉండరు. ఒకే ఒక వృద్ధ మహిళ అన్నీ తానే వంట చేస్తుంది.. వడ్డిస్తుంది.. ఆమె ఎవరో కాదు ఆ హోటల్ యజమాని యశోదమ్మ. ఆమె వయస్సు సుమారు 70 ఏళ్లు. ఆమె తెల్లవారుజామున ఐదు గంటలకు నిద్రలేచి పదింటికల్లా 50 మందికి సరిపడా భోజనాన్ని సిద్ధం చేస్తుంది. ఈ వయసులో ఎవరి సహాయం తీసుకోకుండా ఆమె ఒక్కరే వంటలు సిద్ధం చేయడం అంటే ఆషామాషీ కాదు.. అలా అని ఏదో ఒకటి వండి పెట్టకుండా వెజ్, నాన్ వెజ్ వంటకాలను రుచి తయారు చేస్తోంది.
ఈ హోటల్ లో ఎటువంటి ధరల పట్టిక లు ఉండవు. కేవలం ఒక ప్లాస్టిక్ బాక్స్ ఉంటుంది. ఆ హోటల్ లో క్యాష్ కౌంటర్ ఉండదు. భోజనం చేసిన వాళ్లు ఎవరికి ఎంత ఇవ్వాలనిపిస్తే అంతా ఆ బాక్స్ లో వేసి వెళ్తే చాలు..ఈ వయసులో కూడా ఎటువంటి లాభాపేక్ష లేకుండా ఆమె చేసే సేవ పై చుట్టుపక్కల వాళ్ళు అందరూ ఎంతో మెచ్చుకుంటూ ఉంటారు. ఈ హోటల్ గురించి యశోదమ్మని అడిగితే.. ఆకలి తీర్చడంలో కన్నా సంతృప్తి ఇంకెందుకు ఉంటుందని ఆమె అంటున్నారు.. ఆ హోటల్ సమీపంలో పలు కోచింగ్ సెంటర్లు ఉన్నాయి. దాంతో విద్యార్థులు, ఫ్యాకల్టీ, బాటసారులు యశోదమ్మ హోటల్ కు క్యూ కడుతున్నారు. మీరు ఎప్పుడైనా కేరళ వెళ్తే యశోదమ్మ హోటల్ లో భోజనం చేసి రండి..