careplex vitals app: దేశంలో కరోనా రెండవ దశ తీవ్ర ఆందోళనకు గురి చేస్తోంది. మొదటి దశతో పోల్చుకుంటే రెండవ దశలో వైరస్ వేగంగా వ్యాప్తి చెందుతోంది. వ్యాధి తీవ్రత అధికంగా ఉంది. గత ఏడాది కరోనా ఫస్ట్ ఫేస్ లో ఆక్సిజన్ ఇబ్బందులు తలెత్తలేదు. కానీ ఇప్పుడు ఎక్కువ మంది కరోనా బాధితులకు ఆక్సిజన్ అవసరం అవుతోంది. ఆక్సిజన్ కొరత ఏర్పడటంతో కరోనా బాధితులు ఇబ్బందులు పడుతున్నారు. దీంతో శరీరంలోని ఆక్సిజన్ స్థాయిలు తెలిపే ఆక్సీమీటర్ల, స్మార్ట్ వాచ్ లకు ఒక్క సారిగా డిమాండ్ పెరిగింది. గతంలో 400 – 500 లకు విక్రయించిన పల్స్ ఆక్సిమీటర్ ధరలు ఆమాంతం పెరిగిపోయాయి. రూ.2వేలు, 2500ల వరకూ ధరలు పెరిగిపోయాయి. ఇంత ధర పెట్టి ఆక్సిమీటర్ కొనుగోలు చేసుకునే బదులు స్మార్ట్ ఫోన్ లోనే యాప్ ద్వారా ఆక్సిజన్ లెవల్స్, పల్స్, శ్వాసక్రియల రేట్లు తెలుసుకుంటే బాగుంది కదా అన్న ఆలోచన కోల్‌కతాకు చెందిన కేర్ నౌ హెల్త్ కేర్ అనే అంకుర సంస్థ ప్రతినిధికి వచ్చింది. ఆ ఆలోచనలకు అనుగుణంగా ఈ సంస్థ “కేర్ ఫ్లిక్స్ వైటల్స్ యాప్” ను రూపకల్పన చేసింది.
ఫోటో ప్లెథిస్మాగ్రఫీ టెక్నాలజీతో, కృత్రిమ మేథ సాయంతో కేర్ ప్లిక్స్ వైటల్స్ యాప్ పని చేస్తుంది. సాధారణంగా ఆక్సీమీటర్లలో ఇన్ ఫ్రారెడ్ లైట్ సెన్సార్లు ఉంటాయి. కానీ ఈ యాప్ లో కేవలం మన ఫోన్ లోని ఫ్లాష్ ఆధారంగా ఆక్సిజన్ స్థాయి తెలుసుకోవచ్చు. ఈ యాప్ ను తెరిచి మన ఫోన్ ఫ్లాష్ లైట్ ఆన్ చేసి వెనుక కెమెరా పై మన వేలిని ఉంచాలి. తర్వాత స్కాన్ అనే బటన్ నొక్కగానే నలభై సెకన్లలో ఆక్సిజన్, పల్స్, శ్వాసక్రియ రేట్లన యాప్ లో చూపిస్తుందని హెల్త్ కేర్ సహా వ్యవస్థాపకుడు శుభబ్రాతా పాల్ తెలిపారు. ఈ ఏడాది ప్రారంభంలోనే దీనిపై క్లినికల్ ట్రయల్స్ నిర్వహించామని ఆయన చెప్పారు. క్లినికల్ ట్రయల్స్ ద్వారా ఈ యాప్ 96 శాతం సమర్థవంతంగా పని చేస్తున్నట్లు నిర్ధారణ అయ్యిందని పేర్కొన్నారు.
careplex vitals app: ఈ యాప్ ను ఇలా డౌన్ లోడ్ చేసుకోవాలి
ఈ యాప్ ప్రస్తుతం ఐవోఎస్ వినియోగదారుల కోసం యాప్ స్టోర్ లో అందుబాటులో ఉంది. అండ్రాయిడ్ యూజర్ల కోసం అయితే వెబ్ సైట్ లో ఏపికేను అందుబాటులోకి ఇచ్చారు. త్వరలో ప్లేస్టోర్ లోకి తీసుకురానున్నారని సమాచారం. సింగిల్ యూజర్ వినియోగదారుల కోసం ఉచితంగా అందిస్తున్నారు. అంతకు మించి సేవలు కావాలంటే డబ్బులు చెల్లించాల్సి ఉంటుంది. ఆ వివరాలు కేర్ నౌ వెబ్ సైట్ లో చూడవచ్చు.