Sanjal Gavande: ప్రపంచ వ్యాప్తంగా ఇప్పుడు అంతరిక్ష యాత్రలు హాట్ టాపిక్ గా ఉన్న సంగతి తెలిసిందే. ఇటీవలే వర్జిన్ గెలాక్టిక్ తో బ్రాన్సన్ నింగిలోకి పయనించగా, త్వరలో అమెజాన్ వ్యవస్థాపకుడు జెఫ్ బెజోస్ అంతరిక్ష యానానికి సన్నద్దం అవుతున్నారు. అంతరిక్ష యానంలో భారతీయుల పాత్ర క్రియాశీలకంగా ఉంది. బ్రాన్సన్ ప్రయాణంలో భారత సంతతికి చెందిన వనిత శిరీష కీలకంగా వ్యవహరించినట్లే బెజోస్ యాత్రలో మరో భారతీయ వనిత కీలక భూమిక పోషిస్తున్నారు. జెఫ్ బెజోస్ నేతృత్వంలో ఈ నెల 20న రోదసిలోకి తీసుకువెళ్లే న్యూ షెపర్డ్ రాకెట్ వ్యవస్థను నిర్మించిన ఇంజనీర్ల బృందంలో భారత్ కు చెందిన 30 ఏళ్ల యువతి సంజల్ గవాండే క్రీయాశీల పాత్ర పోషించారు.
మహారాష్ట్రలోని కల్యాణ్ ప్రాంతానికి చెందిన మున్సిపల్ ఉద్యోగి అశోక్ గవాండే కుమార్తె సంజల్ గవాండే ముంబయి యూనివర్శిటీలో మెకానికల్ ఇంజనీరింగ్ పూర్తి చేసింది. 2011 లో అమెరికాలోని మిషిగన్ టెక్నోలాజిస్ యూనివర్శిటీలో మాస్టర్ డిగ్రీ పొందింది. ఆమె తొలుత నాసాలో ఉద్యోగానికి ధరఖాస్తు చేయగా పౌరసత్వ సమస్యతో ఎంపిక కాలేదు. అనంతరం బెజోస్ సంబంధించిన అంతరిక్ష సంస్థ బ్లూ ఆరిజన్ లో సిస్టమ్ ఇంజనీర్ గా పని చేస్తున్నారు. ఈ సందర్భంగా సంజల్ గవాండే తండ్రి అశోక్ గవాండే చాలా సంతోషాన్ని వ్యక్తం చేశారు. తన కుమార్తె తొలుత మెకానికల్ ఇంజనీరింగ్ లో చేరినప్పుడు ఒక అమ్మాయి ఈ బ్రాంచ్ ఎంచుకోవడం ఏమిటని చాలా మంది అన్నారనీ, కానీ అందరి అంచనాలకు భిన్నంగా తాము గర్వపడేలా తమ కుమార్తె రాణిస్తోందని ఆనందం వ్యక్తం చేశారు.