AP DGP: వైసీపీ ప్రభుత్వానికి కొరకరాని కొయ్యగా మారిన రెబల్ ఎంపి రఘురామ కృష్ణంరాజుకు మరో బాణం ఎక్కుపెట్టారు. ఇటీవల జగన్మోహనరెడ్డి సర్కార్ డీజీపీ గౌతమ్ సవాంగ్ ను అర్ధాంతరంగా బదిలీ చేసి ఆయన స్థానంలో ఇంటెలిజెన్స్ డీజీగా ఉన్న కసిరెడ్డి రాజేంద్రనాథ్ రెడ్డిని నియమించిన సంగతి తెలిసిందే. అయితే రాష్ట్ర ప్రభుత్వం డీజీపీ నియామకంలో సీనియారిటీని చూడకుండా కసిరెడ్డి రాజేంద్రనాథ్ రెడ్డిని నియమించింది. సహజంగా ఆ స్థానంకు అర్హత ఉన్న అధికారులు తమకు ఆ పదవి రాకపోతే తమకు అన్యాయం జరిగింది అంటూ క్యాట్ కో, కోర్టుకో వెళుతారు. గతంలో ఆ విధంగా పలువురు అధికారులు వెళ్లిన సందర్భాలు ఉన్నాయి. కానీ ఏపిలో మాత్రం ఇలాంటి అన్యాయంపై ఎవరూ నోరు మెదపలేదు.
AP DGP: హోంశాఖ మంత్రి, యూపీఎస్సి కు లేఖ
అయితే ఐపీఎస్ అధికారులు ఎవరూ స్పందించకపోయినా రెబల్ ఎంపి రఘురామ కృష్ణంరాజు దీనిపై స్పందించారు. దాదాపు 12 మంది డీజీపీ స్థాయి అధికారులను కాదనీ కింద వరుసలో ఉన్న కసిరెడ్డి రాజేంద్రనాథ్ రెడ్డికి డీజీపీ హోదా ఎలా ఇచ్చారంటూ రఘురామ కృష్ణంరాజు ప్రశ్నిస్తున్నారు. దీనిపై ఆయన హోంశాఖ మంత్రితో పాటు యూనియన్ పబ్లిక్ సర్వీస్ కమిషన్ కు లేఖ రాశారు. పార్లమెంట్ సభ్యుడి హోదాలో చేసిన ఫిర్యాదుపై కేంద్రం స్పందిస్తుంటుంది. దానికి సంబంధించి వారి నుండి తాజాగా లేఖ రావడంతో రఘురామ మళ్లీ గళం విప్పడం చర్చనీయాంశం అయ్యింది. ఉన్నత స్థాయి పోలీస్ వర్గాల్లో దీనిపై చర్చ జరుగుతోంది. తాము చేయలేని పని ఓ ఎంపి చేశారని పలువురు సీినియర్లు సంబరపడుతున్నారుట.
యూపీఎస్సీ నుండి ప్రభుత్వానికి లేఖ..?
సీఎం జగన్ తన సొంత జిల్లా, తన సామాజికవర్గం అన్న కోణంలోనే కసిరెడ్డి రాజేంద్రనాథ్ రెడ్డికి డీజీపీ పోస్టింగ్ ఇచ్చారని రఘురామ కృష్ణంరాజు ఆరోపిస్తున్నారు. రాష్ట్ర ప్రభుత్వం వెంటనే స్పందించి నిబంధనల ప్రకారం ముగ్గురు పేర్లతో ప్రతిపాదనలు కేంద్రానికి పంపాలని డిమాండ్ చేశారు. దీనిపై రాష్ట్ర ప్రభుత్వం నుండి గానీ, యూపీఎస్సి నుండి గానీ స్పందన రాకపోతే కోర్టును సైతం ఆశ్రయించే యోచనలో రఘురామ కృష్ణంరాజు ఉన్నట్లు ఆయన సన్నిహిత వర్గాలు పేర్కొంటున్నాయి. మరో పక్క ఇప్పటికే రాష్ట్ర ప్రభుత్వానికి యూపిఎస్సీ నుండి లేఖ అందినట్లు తెలుస్తోంది. రఘురామ కృష్ణం రాజు లేఖపైనే యూపీఎస్సీ స్పందించి రాష్ట్ర ప్రభుత్వానికి లేఖ రాసి ఉండవచ్చని భావిస్తున్నారు. యూపిఎస్సీ నుండి లేఖ అందితే ప్రభుత్వ ప్రధాన కార్యదర్శి నుండి ముగ్గురు లేదా అయిదుగురితో కూడిన అర్హుల జాబితాను యూపిఎస్సీకి పంపించాల్సి ఉంటుంది.