CI Swarnalatha: రాష్ట్ర వ్యాప్తంగా సంచలనం సృష్టించిన విశాఖ నోట్ల మార్పిడి కేసులో అరెస్టు అయిన హోంగార్డ్స్ ఇన్స్ పెక్టర్ స్వర్ణలత పై ఆ శాఖ ఉన్నతాధికారులు క్రమశిక్షణా చర్యలు చేపట్టారు. నాన్ బెయిలబుల్ సెక్షన్ ల కింద అమెతో పాటు కానిస్టేబుల్ హేమసుందర్, హోంగార్డు వి శ్రీను, మధ్యవర్తి సూరిబాబులను పోలీసులు అరెస్టు చేసి కోర్టుకు హజరుపర్చనగా మెజిస్ట్రేట్ వారికి 21వ తేదీ వరకూ రిమాండ్ విధించారు. దీంతో వీరిని విశాఖపట్నంలోని సెంట్రల్ జైలుకు తరలించారు. స్వర్ణలత బెయిల్ కు దరఖాస్తు పెట్టుకున్నారు. గతంలో కూడా స్వర్ణలతపై చాలా ఆరోపణలు వచ్చాయని అంటున్నారు.
ఏఆర్ హోంగార్డు ఎస్ఐగా పని చేస్తున్న సమయంలోనే హోంగార్డు నియామకాల విషయంలో ఆరోపణలు వచ్చాయి. తర్వాత విజయవాడ బదిలీపై వెళ్లగా, కొంత కాలం పని చేసి శ్రీకాకుళం ఏఆర్ కు బదిలీ అయ్యారు. అక్కడ పని చేస్తుండగా, జిల్లాల విభజన జరగడంతో బదిలీపై అనకాపల్లి జిల్లాకు వెళ్లారు. ఆ తర్వాత విశాఖలో ఖాళీ ఉండటంతో అక్కడికి వచ్చారు. కొంత కాలం పాటు సిటీ ట్రైనింగ్ సెంటర్ లో పని చేసిన తర్వాత హోంగార్డుల రిజర్వు ఇన్స్ పెక్టర్ (ఆర్ఐ) గా బాధ్యతలు చేపట్టారు. నోట్ల మార్పిడి కేసులో అరెస్టు అయిన నేపథ్యంలో ఇన్స్ పెక్టర్ స్వర్ణలత, కానిస్టేబుల్ హేమసుందర్ లను ఉన్నతాధికారులు సస్పెండ్ చేశారు.
ఇన్స్ పెక్టర్ స్వర్ణలత సినిమాలపై మోజుతో హీరోయిన్ గా ఏపీ 31 నంబర్ మిస్సింగ్ అనే టైటిల్ తో ఓ మూవీ నిర్మించాలని అనుకుంటున్నారు. ఇందులో ఆమెది పోలీస్ ఆఫీసర్ పాత్ర. సినిమాకు సంబంధించి పోస్టర్ ను కూడా విడుదల చేశారు. సినిమాల మీద మోజుతో ఆమె ప్రత్యేకంగా కొరియోగ్రాఫర్ ను ఏర్పాటు చేసుకుని డ్యాన్స్ లో తర్ఫీదు పొందుతున్నారు. పలు టాలీవుడ్ పాటలకు ఆమె చేసిన డ్యాన్స్ కు సంబంధించి వీడియోలు ఇప్పుడు సోషల్ మీడియాలో వైరల్ అయ్యాయి.
రాష్ట్ర పోలీసు అధికారుల అసోసియేషన్ ఉపాధ్యక్షురాలుగా ఉన్న స్వర్ణలత మీడియా సమావేశాలు నిర్వహిస్తూ పోలీస్ వర్గాలను కించపరుస్తూ మాట్లాడిన నేతలపై పంచ్ డైలాగ్ లు పేలుస్తుంటారనే పేరు ఉంది. మరో విశేషం ఏమిటంటే ఆమె సొంత జిల్లా విజయనగరంలో స్వర్ణ ఫౌండేషన్ పేరుతో స్వచ్చంద సంస్థ కార్యకలాపాలు కూడా నిర్వహిస్తున్నట్లు వెల్లడైంది. ఈ కేసు కారణంగా ఆమె స్వచ్చంద సంస్థ ద్వారా చేసిన మంచి పనులు కూడా మంట గలిసే పరిస్థితి ఏర్పడింది.
CI Swarna Latha: ఇన్స్పెక్టర్ స్వర్ణలతలో మరో కోణం సూపరో సుపర్.. ఊహకందని బిగ్ ట్విస్ట్