GSLV F-12 Rocket: నెల్లూరు జిల్లా శ్రీహరికోటలోని సతీష్ ధవన్ అంతరిక్ష కేంద్రం నుండి జీఎస్ఎల్వీ ఎఫ్ – 12 రాకెట్ ప్రయోగం సక్సెస్ అయ్యింది. సోమవారం ఉదయం షార్ రాకెట్ ప్రయోగ కేంద్రంలోని సెకండ్ లాంచ్ ప్యాడ్ నుండి 10.42 గంటలకు నిప్పులు చెరుగుతూ రాకెట్ నింగిలోకి దూసుకెళ్లింది. ఆ పై నిర్ణీత సమయంలో ఎన్వీఎస్ -01 ఉప గ్రహాన్ని రాకెట్ కక్షలోకి ప్రవేశపెట్టింది. అనంతరం ప్రయోగం విజయవంతమైనట్లు ఇస్రో చైర్మన్ సోమనాథ్ ప్రకటించారు. రాకెట్ విజయవంతంతో దేశీయ నేవిగేషన్ సేవలు అందించనున్నది.
జీఎస్ఎల్వీ ఎఫ్ – 12 రాకెట్ పొడవు 51.7 మీటర్లు, బరువు 420 టన్నులు. 2,232 కిలోల బరువు ఉన్న ఎన్వీఎస్ 01 జీవితకాలం 12 ఏళ్లు. రాకెట్ ప్రయోగం విజయవంతం కావడంతో సతీష్ ధావన్ అంతరిక్ష కేంద్రంలోని మిషన్ కంట్రోల్ సెంటర్ లో శాస్త్రవేత్తలు సంబరాలు చేసుకున్నారు. సహచర శాస్త్రవేత్తలను ఇస్రో చైర్మన్ డాక్టర్ సోమనాథ్ అభినందించారు. ఈ సందర్భంగా ఇస్రో చైర్మన్ సోమనాథ్ మాట్లాడుతూ ఈ విజయం ఇస్రో సభ్యుల కృషి వల్లే సాధమైందని అన్నారు. రాకెట్ ప్రయోగంలో క్రయోజనిక్ స్టీజీ చాలా కీలకమైందనీ, ఆ స్టేజ్ కూడా సవ్యంగా సాగిందని పేర్కొన్నారు.