Amla Rice: కార్తీకమాసంలో చాలామంది ఉపవాసాలు ఉంటారు కొంతమంది ఒక్క పూట మాత్రమే భోజనం చేస్తారు కార్తిక మాసంలో ఉసిరి కు చాలా ప్రత్యేకత ఉంది. కార్తీక మాసంలో ఉసిరి చెట్టు కింద వనభోజనాలు చేయాలని, ఉసిరి చెట్టు కింద దీపం వెలిగించమని పెద్దలు చెబుతున్నారు. ఉసిరికాయలో విటమిన్ సి సమృద్ధిగా లభిస్తుంది. ఈ సీజన్లో ఉసిరికాయ కచ్చితంగా తినాలి అని పెద్దలు చెబుతున్నారు. కార్తీకమాసంలో ఉసిరి అన్నం చేసుకుని తినడం అన్ని రకాలుగా ఆరోగ్య దాయకం. ఉసిరి రైస్ ని ఎలా తయారు చేయాలో ఇప్పుడు చూద్దాం..
ఉసిరి రైస్ కు కావలసిన పదార్థాలు..
ఉసిరికాయలు -6, అన్నం రెండు కప్పులు, నూనె నాలుగు చెంచాలు, వేరుశనగ రెండు చెంచాలు, పచ్చిశనగపప్పు రెండు చెంచాలు, మినప్పప్పు ఒక చెంచా, ఎండుమిర్చి ఐదు, ఆవాలు అర చెంచా, పసుపు పావు టీ స్పూన్, పంచదార ఒక చెంచా, కరివేపాకులు 2 రెబ్బలు, ఉప్పు రుచికి సరిపడినంత.
ముందుగా ఉసిరికాయలో గింజల్ని తీసేసి మిక్సీలో వేసి పేస్టులా తయారు చేసుకోవాలి. ఉడికించిన అన్నాన్ని ఒక పళ్లెంలో వేసి ఆరబెట్టాలి. స్టవ్ వెలిగించి సిమ్ లో ఉంచి బాండీ పెట్టి అందులో నూనె వేయాలి. నూనె వేడెక్కాక అందులో ఆవాలు, పచ్చిశనగపప్పు, వేరుశనగ, మినప్పప్పు, ఎండుమిర్చి వేసి వేయించాలి. కరివేపాకు కూడా వేయాలి. తాలింపు వేశాక అందులో ఉసిరికాయ మిశ్రమాన్ని వేసి రెండు నిమిషాల పాటు తిప్పాలి. ఆ తర్వాత పసుపు వేసి ఒక నిమిషం పాటు వేయించాలి. ఈ మిశ్రమాన్ని అన్నంలో వేసి బాగా కలపాలి. చివరిగా ఒక చెంచా పంచదార వేసి కలపాలి. ఒక గంట వరకు ఈ రైస్ ను అలాగే పక్కన పెట్టి ఉంచాలి. ఆ తరువాత ఉసిరికాయ రైస్ ను తింటే చాలా టేస్టీగా ఉంటుంది. ఆరోగ్యానికి కూడా ఉసిరికాయ అన్నం మంచిది.
