Pakistan PM Imran Khan: పాకిస్థాన్ సుప్రీం కోర్టు ఆదేశాలతో జాతీయ పార్లమెంట్ పునరుద్దరణ జరిగింది. నేడు ప్రధాని ఇమ్రాన్ ఖాన్ పై ప్రతిపక్షాలు ప్రతిపాదించిన అవిశ్వాస తీర్మానంపై ఓటింగ్ జరగనున్నది. ప్రతిపక్షాలు ఇమ్రాన్ ఖాన్ ప్రభుత్వంపై అవిశ్వాస తీర్మానం ఇచ్చిన నాటి నుండి పాక్ లో రాజకీయ పరిణామాలు వేగంగా మారాయి. ప్రతిపక్షాల అవిశ్వాస తీర్మానాన్ని డిప్యూటి స్పీకర్ తిరస్కరించడం, ఆ వెంటనే వ్యూహాత్మకంగా ఇమ్రాన్ ఖాన్ జాతీయ పార్లమెంట్ ను రద్దు చేస్తున్నట్లు ప్రకటించి అధ్యక్షుడికి సిఫార్సు చేయడం, ప్రధాని సిఫార్సును అధ్యక్షుడు ఆమోదించడం జరిగిపోయాయి. ఈ పరిణామాలపై ప్రతిపక్షాలు పాకిస్థాన్ సుప్రీం కోర్టును ఆశ్రయించగా, డిప్యూటి స్పీకర్ చర్యను సుప్రీం కోర్టు తప్పుబట్టింది. రాజ్యాంగ విరుద్దంగా జాతీయ పార్లమెంట్ ను రద్దు చేసినట్లు పేర్కొన్న సుప్రీం ధర్మాసనం జాతీయ పార్లమెంట్ ను పునరుద్దరిస్తున్నట్లు పేర్కొని అవిశ్వాస తీర్మానంపై ఓటింగ్ నిర్వహించాలని ఆదేశాలు జారీ చేసింది. సుప్రీం కోర్టు ఆదేశాలతో ఈ ఉదయం 10.30 గంటలకు పాకిస్థాన్ జాతీయ అసెంబ్లీ సమావేశం కానున్నది.
Pakistan PM Imran Khan: ఓటింగ్ జరిగి పదవి కోల్పోతే..
శుక్రవారం విడుదల చేసిన ఆరు పాయింట్ల అజెండా మేరకు నాల్గవ అంశంగా అవిశ్వాస తీర్మానంపై ఓటింగ్ జరగనుంది. 342 స్థానాలు ఉన్న పాక్ జాతీయ అసెంబ్లీలో మెజార్టీకి 172 ఓట్లు అవసరం కాగా, మిత్ర పక్షాలు దూరం కావడంతో పాటు సొంత పార్టీ చెందిన సభ్యులు వ్యతిరేకంగా మారడంతో ఇమ్రాన్ సర్కార్ మైనార్టీలో పడింది. ఓటింగ్ జరిగి పదవి కోల్పోతే విశ్వాస పరీక్ష ద్వారా పదవి కోల్పోయిన తొలి ప్రధాని అవుతారు ఇమ్రాన్ ఖాన్. ఈ నేపథ్యంలో విశ్వాస పరీక్షకు ముందే ఇమ్రాన్ ఖాన్ తన పదవికి రాజీనామా చేస్తారని భావిస్తున్నారు. ఇప్పటికే ఇమ్రాన్ ఖాన్ తన ఓటమిని పరోక్షంగా అంగీకరించారు.
Pakistan PM Imran Khan: కొత్త ప్రభుత్వ ఏర్పాటునకు ప్రతిపక్షాలు సన్నాహాలు
శుక్రవారం జాతిని ఉద్దేశించి ప్రసంగించిన ఇమ్రాన్ ఖాన్ కీలక వ్యాఖ్యలు చేశారు. కొత్త ప్రభుత్వం అధికారం చేపట్టే సమయంలో శాంతియుత నిరసనలు తెలియజేయాలని తన మద్దతుదారులకు పిలుపునిచ్చారు. ఇదే సందర్భంగా భారత్ సార్వభౌమాధికారాన్ని ప్రసంశించారు. భారత్ ను ప్రపంచంలోని ఏ దేశం శాసించలేదని పేర్కొన్నారు. మరో పక్క విశ్వాస పరీక్షలో ఇమ్రాన్ ఓటమి ఖాయం కావడంతో కొత్త ప్రభుత్వ ఏర్పాటునకు ప్రతిపక్షాలు సన్నాహాలు చేసుకున్నారు. విపక్షాలు బలపరుస్తున్న పాకిస్థాన్ ముస్లిం లీగ్ – నవాజ్ అధ్యక్షుడు షెహబాజ్ షరీఫ్ నూతన ప్రధానిగా ప్రమాణ స్వీకారం చేసే అవకాశాలు ఉన్నాయి.