సాధార‌ణంగా ఎవ‌రైనా స‌రే చాలా ఖ‌రీదైన వ‌స్తువుల‌ను స్నేహితుల‌కు కాదు క‌దా.. ఇంట్లోని ఇత‌ర కుటుంబ స‌భ్యుల‌కు కూడా అంత సుల‌భంగా వాడుకునేందుకు ఇవ్వ‌రు. కానీ కొంద‌రు మాత్రం ఈ విష‌యంలో అప‌ర దాన‌క‌ర్ణులలా ఉంటారు. ఎవ‌రైనా ఏదైనా అడిగితే కాద‌నుకుండా ఇచ్చేస్తారు. అలా ఓ వ్య‌క్తి తాను రూ.కోట్లు పెట్టి కొన్న కారును స్నేహితుడు అడిగాడ‌ని ఇచ్చాడు. కానీ ఆ స్నేహితుడు మాత్రం ఆ కారును కంట్రోల్ చేయ‌డం చేత‌కాక దాన్ని గోడ‌కు గుద్దేశాడు. ఈ క్ర‌మంలో తీసిన ఓ వీడియో ప్ర‌స్తుతం సోషల్ మీడియాలో వైరల్ గా మారింది.
స్పెయిన్‌లోని హుయెల్వా అనే ప్రాంతానికి చెందిన ఓ వ్య‌క్తి 2.15 ల‌క్ష‌ల పౌండ్లు (దాదాపుగా రూ.2.10 కోట్లు) పెట్టి లంబోర్గిని కంపెనీకి చెందిన హురాకాన్ పెర్ఫామెంటె అనే గ్రీన్ క‌ల‌ర్ కారును కొన్నాడు. దాన్ని అత‌ని స్నేహితుడు అడిగాడు క‌దా అని ఇచ్చాడు. అయితే ఆ స్నేహితుడు దాన్ని కంట్రోల్ చేయ‌లేక‌పోయాడు. అదే ప్రాంతంలో ఓ చోట కారు ఓవ‌ర్ స్పీడ్ అయి కంట్రోల్ త‌ప్పింది. దీంతో కారును ఓ నిర్మాణం వ‌ద్ద ఉన్న గోడ‌కు గుద్దేశాడు. త‌రువాత అక్క‌డి నుంచి అత‌ను ప‌రార‌య్యాడు.
https://youtu.be/cmkEqJVmHPU
ఇక పోలీసులు అక్క‌డికి చేరుకుని ఆ కారును గోడ నుంచి బ‌య‌ట‌కు తీసేందుకు నానా క‌ష్టాలు ప‌డ్డారు. అందుకు గాను వారు అక్క‌డ కొన్ని గంట‌ల పాటు విద్యుత్‌ను కూడా నిలిపివేశారు. దీంతో స్థానికులు తీవ్ర అస‌హ‌నానికి లోన‌య్యారు. చాలా సేపు శ్ర‌మించాక కారును పోలీసులు ఎట్ట‌కేల‌కు బ‌య‌ట‌కు తీశారు. అయితే దాన్ని యాక్సిడెంట్ చేసిన వ్య‌క్తి హాస్పిట‌ల్‌లో చికిత్స తీసుకుంటుండ‌గా వారు అత‌న్ని అరెస్టు చేశారు. ఆ స‌మ‌యంలో అత‌ను పోలీసుల‌కు అది త‌న స్నేహుతుడి కార‌ని, తాను దాన్ని అత‌ని నుంచి అడిగే తీసుకున్నాన‌ని తెలిపాడు. అయిన‌ప్ప‌టికీ పోలీసులు అత‌నిపై నిర్ల‌క్ష్యంగా కారును అతి వేగంగా న‌డిపినందుకు కేసు న‌మోదు చేశారు. కాగా కారు ముందు భాగం మొత్తం పూర్తిగా ధ్వంస‌మైంది. కారును వెలికి తీస్తుండ‌గా.. షూట్ చేసిన వీడియో ఒక‌టి సోషల్ మీడియాలో వైరల్ అవుతోంది. ఇక ఆ కారు కేవ‌లం 2.9 సెక‌న్ల‌లోనే గంట‌కు సుమారుగా 100 కిలోమీట‌ర్ల వేగాన్ని అందుకోగ‌ల‌దు. అందుక‌నే దాన్ని అత‌ను కంట్రోల్ చేయ‌లేక‌పోయాడ‌ని తెలుస్తోంది..!