Left Side Sleeping: మన పూర్వీకులు పెట్టిన నియమాలు, సాంప్రదాయాలు నేటి తరానికి చాదస్తంగా కనిపిస్తుంటాయి. కానీ ఆ నియమాల్లో శాస్త్రీయ కోణం దాగి ఉందనేది పలు పరిశోధనల్లో రుజువు అవుతోంది. ఆహారం తీసుకునే విషయంలోనే కాక నిద్ర పోయే విషయంలో మన పెద్దలు కొన్ని నియమాలను చెబుతుంటారు. తల తూర్పు వైపు పెట్టి గానీ లేకపోతే దక్షిణం వైపు తలపెట్టి పడుకోవాలని సూచిస్తుంటారు. ఉత్తరం వైపు తలపెట్టి పడుకోకూడదని నియమం పెట్టారు. అందుకు పురాణంలోని గణేష్ జన్మ వృత్తాంతాన్ని వివరిస్తుంటారు. ఇక కుడివైపు నిద్రపోవడం మంచిది కాదని సూచిస్తుంటారు.
ప్రతి ఒక్కరికి తగినంత నిద్ర విశ్రాంతి అవసరం. ఉదయం లేక మధ్యాహ్న భోజనం తర్వాత 30 నుండి 40 నిమిషాల వరకు ఖచ్చితంగా నిద్ర పోవాలి. ఏ కారణం చేతనైనా విశ్రాంతి తీసుకునే అవకాశం లేనిపోతే కనీసం 10 నిమిషాల పాటు వజ్రాసనం వేయాలి. ఇక రాత్రి భోజనం తర్వాత వెంటనే నిద్ర పోకూడదు. కనీసం రెండు గంటల గ్యాప్ ఇచ్చిన అనంతరం నిద్రపోవాలి. రాత్రి భోజనం చేసిన వెంటనే నిద్రపోతే డయాబెటీస్, హార్ట్ ఎటాక్ వంటి వ్యాధులు వచ్చే ప్రమాదం ఉందని చెబుతుంటారు. ఎడమ ప్రక్కకు తిరిగి, ఎడమ చెయ్యి తలకిందకు వచ్చే విధంగా పడుకుంటే అలసట తొలగి పోతుందట.
ఇలా పడుకుంటే వారిలో గురక తగ్గుతుంది. గర్బిణి స్త్రీలకు మంచి రక్త ప్రసరణ జరుగుతుంది. వెన్ను నొప్పి, వీపు నొప్పుల నుండి ఉపశమనం కలుగుతుంది. భోజనం తరువాత జరిగే జీర్ణ క్రియ లో సహాయపడుతుంది. కాలేయం, మూత్ర పిండాలు సక్రమంగా పని చేస్తాయి. గుండెక శ్రమ తగ్గి సక్రమంగా పని చేస్తుంది. ఉదయం అలసట లేకుండా ఉత్సాహంగా ఉంటారు. ఎడమ వైపున తిరిగి పడుకునే విధానం చాలా ఉత్తమమైందని అయుర్వేద వైద్యులు చెబుతున్నారు. ఈ విధానాన్ని అవలంబించి మీ శరీరంలో కలిగే మార్పులను ప్రతి రోజు గమనించవచ్చని అంటున్నారు. మీరు ట్రై చేసి చూడండి.