AP Floods: ఏపి సీఎం జగన్ కు ప్రధాని మోడీ ఫోన్ ..! రాష్ట్రంలో వరద పరిస్థితులపై ఆరా..!!

AP Floods: దక్షిణ కోస్తాంధ్ర, రాయలసీమ జిల్లాల్లో భారీ వర్షాల కారణంగా భీభత్సకర పరిస్థితులు నెలకొన్న సంగతి తెలిసిందే. ఎడతెరిపి లేకుండా కురుస్తున్న వర్షంతో ఎక్కడికక్కడ నదులు, వాగులు, వంకలు పొంగి పోర్లుతున్నాయి. అనంతపురం జిల్లా చిత్రావతి నది వరద ఉగ్రరూపు దాల్చింది. ఈ నేపథ్యంలో ప్రధాన మంత్రి నరేంద్ర మోడి నేడు ఎంపి సీఎం వైఎస్ జగన్ కు ఫోన్ చేశారు. ఏపిలో వర్షాలు, వరదల పరిస్థితులపై ప్రధాన మంత్రి మోడీ ఆరా తీశారు. నిన్నటి నుండి ఏపిలో కురుస్తున్న భారీ వర్షాలు, వరదల గురించి సీఎం జగన్ ను పీఎం మోడీ అడిగి తెలుసుకున్నారు. ప్రభుత్వ చర్యల గురించి, అయిదు జిల్లాల్లో వర్షాలు, వరదల పరిస్థితి గురించి ప్రధాని మోడీకి సీఎం జగన్ వివరించారు. ఈ సందర్భంలో కేంద్రం నుండి అన్ని విధాలుగా సహకారం అందిస్తామని ప్రధాని మోడీ సీఎం జగన్ కు హామీ ఇచ్చారు. ప్రధానంగా చిత్తూరు, నెల్లూరు, కడప, అనంతపురం జిల్లాల్లో భారీ వర్షాలు, వరదల కారణంగా ప్రజలు ఇబ్బందులు పడుతున్నట్లు సీఎం జగన్ వివరించారు. సహాయక చర్యల కోసం నావీ హెలికాఫ్టర్ లను కూడా వినియోగించుకుంటున్నట్లు ప్రధాన మంత్రి మోడీ దృష్టికి సీఎం జగన్ తీసుకువచ్చినట్లు సమాచారం. ముఖ్యంగా పలు జిల్లాల్లో చెరువులకు గండ్లు పడుతున్నాయి. వాగులు ఉదృతంగా ప్రవహిస్తున్నాయని ప్రధాని మోడీ దృష్టికి జగన్ తీసుకువచ్చారు.

AP Floods: కడప జిల్లాలో భారీ ప్రాణనష్టం

భారీ వర్షాల కారణంగా కడప జిల్లా రాజంపేట లో భారీ ప్రాణనష్టం జరిగింది. నందలూరు పరివాహక ప్రాంతంలో గల మందపల్లి, ఆకేపాడు, నందలూరు ప్రాంతాల్లో మూడు ఆర్టీసీ బస్సులు వరద నీటిలో చిక్కుకుని సుమారు 30 మంది చెయ్యేరు వరద ఉధృతిలో కొట్టుకుపోయారు. గాలింపు చర్యల్లో 12 మృతదేహాలను వెలికితీశారు. చిత్రావతి నదిలో ఓ కారు గల్లంతు అవ్వగా నదిలో చిక్కుకున్న వారిని కాపాడేందుకు అగ్నిమాపక దళ సిబ్బంది, కొందరు స్థానికులు సాహసించారు. అయితే కారులోని వారితో సహా స్థానికులు, అగ్నిమాపక సిబ్బంది మొత్తం పది మంది తిరిగి బయటకు వచ్చే పరిస్థితి లేక నదిలోనే ఓ జేసీబీపైనే ఉండిపోయారు. ఈ విషయం అసెంబ్లీ సమావేశంలో ఉన్న రాప్తాడు ఎమ్మెల్యే తోపుదుర్తి ప్రకాశ్ రెడ్డికి తెలియడంతో వెంటనే విషయాన్ని సీఎం వైఎస్ జగన్ దృష్టికి తీసుకువెళ్లారు. తక్షణం స్పందించిన సీఎం జగన్ అనంతపురం జిల్లా కు హెలికాఫ్టర్ పంపాలని అధికారులను ఆదేశించారు. సీఎం ఆదేశాలతో అక్కడకు హెలికాఫ్టర్ చేరుకుని చిత్రావతి నదిలో చిక్కుకున్న పది మందిని సురక్షితంగా వెలుపలికి తీసుకువచ్చారు.