(న్యూస్ ఆర్బిట్ డెస్క్)
గుంటూరు: సోషల్ మీడియాలో అభ్యంతరకర పోస్టులు పెడితే కటకటాల పాలు అవ్వడం ఖాయం. ఫేస్‌బుక్‌లో అభ్యంతరకర పోస్టులు పెట్టినందుకు ఇద్దరు యువకులను పోలీసులు అదుపులోకి తీసుకున్నారు.
గుంటూరు జిల్లా చిలకలూరిపేట వైసిపి ఎమ్మెల్యే విడతల రజనీపై ఫేస్‌బుక్‌లో అభ్యంతరకర పోస్టులు పెట్టారన్న అభియోగంపై నెల్లూరు జిల్లాకు చెందిన ఇద్దరు టిడిపి సానుభూతిపరులను పోలీసులు అరెస్టు చేశారు.
నెల్లూరు జిల్లా విడపలూరుకు చెందిన సత్యవోలు హరిప్రసాద్ రెడ్డి (సత్యంరెడ్డి) ఎమ్మెల్యే విడతల రజని ఫోటోపై ఫేస్‌బుక్‌లో అభ్యంతరకర వ్యాఖ్యలతో పోస్టింగ్ పెట్టాడు. దానికి అదే జిల్లా రావూరు మండలం కండలేరు డ్యామ్‌కు చెందిన పంతగాని ప్రవీణ్ అసభ్యకర కామెంట్స్ పెట్టాడు. దీనిపై చిలకలూరిపేటకు చెందిన వైసిపి నేత మారుబోయిన నాగరాజు పోలీసులకు ఫిర్యాదు చేయగా శనివారం రాత్రి చిలకలూరిపేట అర్బన్ పోలీస్ స్టేషన్‌లో ఆ ఇద్దరిపైనా కేసు నమోదు చేశారు.
ఆదివారం వారి స్వగ్రామంలో ఇద్దరినీ అరెస్టు చేసి పోలీసు స్టేషన్‌కు తరలించారు. సోమవారం నిందితులను కోర్టుకు హజరుపర్చే అవకాశం ఉంది.