Janasena TDP Alliance: ఏపీలో రాజకీయ పార్టీలు అన్నీ ఎన్నికల మూడ్ లోకి వచ్చేశాయి. మార్చి, ఏప్రిల్ నెలలో ఎన్నికలు జరగనున్నాయి. దీంతో ప్రధాన రాజకీయ పార్టీ వైసీపీ ఇప్పటికే అభ్యర్ధుల ఎంపికపై దృష్టి సారించింది. ఆ పార్టీ అధినేత, సీఎం వైఎస్ జగన్మోహనరెడ్డి నియోజకవర్గాల ఇన్ చార్జిలు, సిట్టింగ్ ఎమ్మెల్యేల మార్పులు, చేర్పులపై కసరత్తు చేస్తున్నారు. ఇప్పటికే 11 నియోజకవర్గాలకు కొత్త ఇన్ చార్జిలను నియమిస్తూ మొదటి జాబితా విడుదల చేశారు. రెండో జాబితా ప్రకటనకు పలువురు గోదావరి జిల్లా ఎమ్మెల్యేలు, మంత్రులతో ఇటీవల సమావేశం నిర్వహించారు. 
మరో పక్క టీడీపీ – జనసేన పొత్తులో ఎన్నికలకు వెళ్లాలని డిసైడ్ అయ్యాయి. ఇరుపార్టీల పొత్తు కారణంగా సీట్ల సర్దుబాటుపై చర్చలు జరగాల్సి ఉంది. ఈ క్రమంలో పొత్తులో భాగంగా ఎన్ని స్థానాల్లో పోటీ చేస్తుంది అనే దానిపై సస్పెన్స్ కొనసాగుతోంది. గౌరవ ప్రదంగా సీట్లు సర్దుబాటు ఉంటుంది అని గతంలో పవన్ కళ్యాణ్ పేర్కొన్నారు. ఈ నేపథ్యంలో జిల్లాల వారీగా బలాబలాలను బేరీజు వేసుకుని ఏయే స్థానాల్లో జనసేన అభ్యర్ధులను నిలపాలి అనే దానిపై జనసేన అధినేత పవన్ కళ్యాణ్ దృష్టి సారించారు. శుక్రవారం నుండి మంగళగిరి పార్టీ కేంద్ర కార్యాలయంలో ముఖ్య నేతలు పవన్ కళ్యాణ్, నాదెండ్ల మనోహర్ లు చర్చలు ప్రారంభించారు. 
ఇవేళ, రేపు కూడా వివిధ జిల్లాలు, నియోజకవర్గాల నేతలతో భేటీలు జరిపి క్షేత్ర స్థాయిలో జనసేన బలంగా ఉన్న స్థానాలను గుర్తించి, ఆ తర్వాత సీట్ల సర్దుబాటుపై టీడీపీ అధినేత చంద్రబాబుతో పవన్ కళ్యాణ్ సమావేశం కానున్నారని తెలుస్తొంది. పలువురు జనసేన అభిమానులు, నేతలు మాత్రం 50 నుండి 60 స్థానాలు పొత్తులో భాగంగా తీసుకుంటే గౌరవ ప్రదంగా ఉంటుందని అభిప్రాయపడుతున్నారు. గత అసెంబ్లీ ఎన్నికల్లో జనసేనకు నియోజకవర్గాల్లో వచ్చిన ఓట్ల శాతం, అంతకు 2009 ఎన్నికల్లో ప్రజారాజ్యం పార్టీ అభ్యర్ధులకు వచ్చిన ఓట్ల ఆధారంగా నియోజకవర్గాల గుర్తింపు జరుగుతోంది. 
గెలుపు అవకాశాలు ఉన్న నియోజకవర్గాలతో పాటు ప్రధాన రాజకీయ పార్టీ అభ్యర్ధుల గెలుపు ఓటములను ప్రభావితం చేసే స్థాయిలో ఉన్న సుమారు 30 నుండి 40 నియోజకవర్గాలను జనసేన కు పొత్తులో భాగంగా టీడీపీ ఇచ్చే అవకాశాలు ఉన్నాయన్న ప్రచారం జరుగుతోంది. ప్రస్తుతం జనసేన అధినేత పవన్ కళ్యాణ్ నిర్వహిస్తున్న సమావేశాల తర్వాత ఏయే నియోజకవర్గాలను జనసేన ఆశిస్తుంది అనేది ఒక క్లారిటీకి వచ్చే అవకాశం ఉందని అంటున్నారు.
AP Politics: ఏపీ ఎన్నికల్లో కొత్తగా రెండు రాజకీయ పార్టీలు..ఏ పార్టీకి ప్లస్ .. ఏ పార్టీకి మైనస్..?