Suicide: ఓ నీచుడు చేసిన సిగ్గుమాలిన పనికి ఒక కుటుంబం అన్యాయం అయిపోయింది. వివాహిత స్నానం చేస్తుండగా ఓ యువకుడు సెల్ ఫోన్ ద్వారా తీసిన వీడియో వైరల్ కావడంతో ఆమె భర్త మనస్థాపంతో ఆత్మహత్య చేసుకున్నాడు. ఈ ఘటన కృష్ణాజిల్లా బాపులపాడు మండలం ఏ సీతారాంపురంలో జరిగింది.
గ్రామానికి చెందిన ఓ వివాహిత బాత్ రూమ్ లో స్నానం చేస్తుండగా అదే గ్రామానికి చెందిన జయబాబు అనే యువకుడు వీడియో తీసి దాన్ని వైరల్ చేశాడు. ఈ విషయం తెలిసిన ఆమె భర్త దీనిపై వీరవల్లి పోలీస్ స్టేషన్ ఫిర్యాదు చేశాడు. ఈ ఘటనపై పోలీసులు దర్యాప్తు చేస్తున్న క్రమంలోనే తీవ్ర మనస్థాపానికి గురైన బాధితురాలి భర్త శనివారం ఆత్మహత్య చేసుకున్నాడు. తన భర్త మరణానికి కారణం జయబాబు అని బాధితురాలు ఆరోపిస్తోంది.
భర్త ఆత్మహత్యతో తన తన కుటుంబానికి దిక్కులేకుండా పోయిందని ఆమె కన్నీరు మున్నీరుగా విలపించింది. తన ఇద్దరి పిల్లల పరిస్థితి ఏమవుతుందోనని ఆందోళన చెందుతోంది. పోలీసులు తనకు తగిన న్యాయం చేయాలంటూ వేడుకుంది. అయితే పోలీసులకు ఫిర్యాదు చేసినందుకు బాధితురాలి భర్తను చంపేస్తానని జయబాబు బెదిరించాడని అందుకు భయపడి ఆత్మహత్య చేసుకుని ఉంటాడని గ్రామస్తులు భావిస్తున్నారు. పోలీసులు కేసు నమోదు చేసి దర్యాప్తు చేస్తున్నారు. ఆ నీచుడు చేసిన పనికి గ్రామస్తులు అసహించుకుంటున్నారు. నిందితుడిని కఠినంగా శిక్షించాలని కోరుతున్నారు.