Joe Biden: అమెరికా అధ్యక్షుడు జో బైడెన్ కాన్వాయ్ లోని ఒక సెక్యురిటీ వాహనాన్ని ఓ కారు ఢీకొనడం తీవ్ర కలకలం రేపింది. ఈ ఘటనలో అధ్యక్షుడు బైడెన్, ఆయన సతీమణి జిల్ బైడెన్ కు ఎలాంటి ప్రమాదం జరగలేదని శ్వేత సౌధం వర్గాలు వెల్లడించాయి. అధ్యక్ష ఎన్నికల్లో మరో మారు పోటీ చేసేందుకు విస్తృత సన్నాహాలు చేసుకుంటున్న బైడెన్ .. డెలావర్ లోని విల్మింగ్టన్ లో తన ప్రచార కమిటీ సభ్యులతో ఆదివారం రాత్రి సమావేశమైయ్యారు. 
సమావేశం అనంతరం అధ్యక్ష దంపతులు డిన్నర్ ముగించుకుని ఆఫీసు బయట ఉన్న కాన్వాయ్ వద్దకు వస్తుండగా, ఓ కారు వేగంగా దూసుకువచ్చి యూఎస్ సీక్రెట్ సర్వీస్ వాహనాన్ని ఢీకొట్టింది. అనంతరం మరో వాహనంపైకి దూసుకువెళ్లేందుకు ప్రయత్నించింది. ఈ సమయంలో జిల్ బైడెన్ అధ్యక్ష వాహనంలో కుర్చుని ఉండగా.. జో బైడెన్ వాహనానికి సమీపంలోనే ఉన్నారు. బైడెన్ కు కేవలం 130 అడుగుల దూరంలో ఈ ఘటన జరిగింది.
వెంటనే అప్రమత్తమైన భద్రతా సిబ్బంది బైడెన్ ను వేగంగా అధ్యక్ష వాహనంలోకి తీసుకువెళ్లారు. ఘటనకు పాల్పడిన వాహనాన్ని సీక్రెట్ సర్వీస్ సిబ్బంది చుట్టుముట్టి సదరు డ్రైవర్ ను అదుపులోకి తీసుకుని విచారిస్తున్నారు. ఘటన నేపథ్యంలో బైడెన్ దంపతులను వెంటనే వైట్ హౌస్ కు తరలించినట్లు అధికారులు వెల్లడించారు. అధ్యక్షుడు, ప్రధమ మహిళ సురక్షితంగా ఉన్నట్లు తెలిపారు. ఈ ఘటనకు సంబంధించి పూర్తి వివరాలు తెలియాల్సి ఉంది.