లైఫ్ ఈజ్ బ్యూటిఫుల్ ఫేమ్ అభిజీత్ బిగ్ బాస్ 4 లోకి ఎంట్రీ ఇచ్చిన సంగతి తెల్సిందే. డెబ్యూ సినిమాతో మంచి పేరే వచ్చినా కానీ ఎందుకనో అభిజీత్ కెరీర్ అనుకున్నంతగా ముందుకు సాగలేదు. ఇక అభిజీత్ మంచి డ్యాన్స్ నెంబర్ తో ఎంట్రీ ఇవ్వగా సరదాగా నాగ్ కాసేపు తనతో ముచ్చటించాడు. లైఫ్ ఈజ్ బ్యూటిఫుల్ లో అమల గారితో నటించిన విషయాన్ని ఈ సందర్భంగా గుర్తు చేసుకున్నాడు అభిజిత్.
ఆ తర్వాత తన కెరీర్ విషయాలు తెలిపి పెళ్లిగోల వెబ్ సిరీస్ లో నటించా అని చెప్పగానే ఇంతకీ నీ పెళ్లి ఎప్పుడు అని సరదాగా వ్యాఖ్యానించాడు నాగార్జున. ఆ మాట అనొద్దని, తన పెళ్లి గురించి ఇంట్లో వాళ్ళు పోరు పెడుతున్నారని తెలిపాడు. కనీసం బిగ్ బాస్ హౌస్ లోనైనా ఎవరినైనా చూసుకో అంటూ ఇంట్లో వాళ్ళు సరదాగా వ్యాఖ్యానించారని తెలిపాడు.
ఇక హౌస్ లోకి ఎంట్రీ ఇచ్చే ముందు అభిజీత్ కు నాగార్జున చిన్న క్విజ్ పెట్టాడు. సరదాగా ఎవరిని ముద్దు పెట్టుకుంటావు, పెళ్లి చేసుకుంటావు, డేట్ కు వెళ్తావు అంటూ ముగ్గురు హీరోయిన్ల ఫోటోలను చూపించాడు నాగ్. ఆ ముగ్గురూ పూజ హెగ్డే, కాజల్ అగర్వాల్, తమన్నా కాగా అందులో పూజ హెగ్డేను పెళ్లి చేసుకుంటానని, తమన్నాను ముద్దు పెట్టుకుని, కాజల్ అగర్వాల్ తో డేట్ కు వెళతానని తెలిపాడు.
మరో సెట్ ముగ్గురు ఫోటోలు చూపించగా బిగ్ బాస్ 4 లోకే ఎంట్రీ ఇచ్చిన మోనాల్ గజ్జర్ ఫోటో ట్రెడిషనల్ గా ఉందని, అందుకని ఆమెను పెళ్ళాడతానని, నభా నటేష్ ను ముద్దు పెట్టుకుని రాశి ఖన్నాతో డేట్ కు వెళతానని వ్యాఖ్యానించాడు. ఇంతకీ అభిజీత్ నిజంగానే లవ్ లో పడి బిగ్ బాస్ నుండి బయటకు వస్తాడా?