Rapido: ప్రముఖ టాలీవుడ్ హీరో అల్లు అర్జున్ రాపిడో అనే బైక్ టాక్సీ షేరింగ్ కంపెనీ ప్రకటనలో నటించిన విషయం తెలిసిందే. ఈ కమర్షియల్ యాడ్(rapido ad)లో బన్నీ ఆర్టీసీని కించపరిచేలా నటించారని తెలంగాణ ఆర్టీసీ మేనేజింగ్ డైరెక్టర్ వీసీ సజ్జనార్ ఆగ్రహం వెళ్లగక్కారు. అంతేకాదు బన్నీకి లీగల్ నోటీసులు కూడా పంపించారు. ప్రజలను ప్రభావితం చేయగల హోదాలో ఉండి కూడా ప్రజా రవాణా వ్యవస్థను తక్కువ చేసి చూపించడం సరికాదన్నారు. ఇలాంటి ప్రకటనల్లో నటించే ముందు ఒకటికి రెండుసార్లు ఆలోచించాలని సూచించారు. అలాగే వ్యాపార నీతులను పాటించని రాపిడో సంస్థకు కూడా లీగల్ నోటీసులు పంపించారు. కానీ ఇప్పటివరకు రాపిడో యాడ్ టీవీల్లో, యూట్యూబ్ లో ప్రసారం అవుతూనే ఉంది. దాంతో సజ్జనార్ కోర్టును ఆశ్రయించారు.
ఆర్టీసీని కించపరిచేలా యాడ్
రాపిడో యాడ్ లో అల్లు అర్జున్ ఒక హోటల్లో దోసె చేస్తూ కనిపిస్తాడు. అంతేకాదు ప్రయాణికులను ఆర్టీసీ బస్సు దోశను ఖైమా కొట్టినట్లు నలిపేస్తుందని బన్నీ డైలాగులు చెప్పాడు. ఇందులో ఆంధ్ర ప్రదేశ్ ఆర్టీసీ బస్సును కూడా చూడొచ్చు. అయితే ఒక ప్రైవేటు సంస్థ అయిన రాపిడోని ప్రమోట్ చేసేందుకు ఆర్టీసీని తక్కువ చేసి చూపించడం చాలా తప్పు అని సజ్జనార్ తో సహా చాలామంది అసహనం వ్యక్తం చేశారు. వెంటనే ఈ ప్రకటనలు నిలిపివేయాలని కోరారు. ఈ వివాదం ముదరడంతో దిద్దుబాటు చర్యలకు పూనుకున్న రాపిడో ఆర్టీసీ బస్సు కనిపించకుండా ప్రకటనను ఎడిట్ చేసింది. కానీ అల్లు అర్జున్ డైలాగులు మాత్రం యథావిధిగా ఉంచేసింది. దాంతో చిర్రెత్తిన సజ్జనార్ కోర్టును ఆశ్రయించారు.
యాడ్ తొలగించాలని ఆదేశించిన నాంపల్లి హైకోర్టు
వివాదాలకు కేంద్ర బిందువుగా మారిన రాపిడో యాడ్ వ్యవహారంపై తాజాగా కోర్టు విచారణ చేపట్టింది. యాడ్ ను పరిశీలించి ఆర్టీసీకి మద్దతుగా తన తీర్పును వెలువరించింది. తక్షణమే యూట్యూబ్ తో సహా అన్ని మాధ్యమాలలో రాపిడో యాడ్ ప్రసారాలను నిలిపివేయాలని ఆదేశించింది. ఈ ప్రకటనను రద్దు చేస్తూ ఉత్తర్వులు జారీ చేసింది. దాంతో బన్నీతో సహా రాపిడో సంస్థకు షాక్ తగిలినట్లయింది. ఎన్నో ఏళ్ళగా పేదవారిని, మధ్యతరగతి ప్రజలను సురక్షితంగా గమ్యస్థానాలకు చేరవేస్తున్న ఆర్టీసీ బస్సుల సేవలను ఎవరూ కూడా చులకన చేయకూడదన్నట్లు నాంపల్లి హైకోర్టు వ్యాఖ్యానించింది. ఎవరైనా మళ్లీ ఈ ప్రకటనను ప్రచారం చేస్తే వారిపై చట్టపరమైన చర్యలు తీసుకుంటామని హైకోర్టు హెచ్చరించింది. ఇలా నటించడం తప్పని అల్లు అర్జున్కు తెలిసేలా నాంపల్లి హైకోర్టు తీర్పు వెలువరించడం ఇప్పుడు చర్చనీయాంశమైంది. ఇప్పటికైనా ఆయన ప్రజా ప్రయోజనాలకు హాని కలిగించే ప్రకటనల్లో నటించకుండా జాగ్రత్త పడతాడో లేదో చూడాలి.
Mogalirekulu: నీకెంతా బలుపు రా?.. మొగలిరేకులు ఫేమ్ ఆర్కే నాయుడు పై సీనియర్ నటి ఫైర్..!