కేంద్ర ప్రభుత్వం ఆడ పిల్లలను రక్షించేందుకు, వారి ప్రగతికి బాటలు వేసేందుకు బేటీ బచావో, బేటీ పఢావో యోజన కార్యక్రమాన్ని చేపట్టిన సంగతి తెలిసిందే. అయితే ఇందులో భాగంగా ఆడ పిల్లల తల్లిదండ్రులు లేదా సంరక్షకులు కేంద్ర ప్రభుత్వం అందిస్తున్న సుకన్య సమృద్ధి యోజన (ఎస్ఎస్వై) పథకాన్ని ఉపయోగించుకోవచ్చు. అందుకుగాను వారు గరిష్టంగా ఇద్దరు వేర్వేరు ఆడపిల్లల పేరిట సుకన్య సమృద్ధి యోజన అకౌంట్లను తెరవవచ్చు. ఈ అకౌంట్లో పొదుపు చేసే డబ్బుకు ఏడాదికి 7.6 శాతం వడ్డీ చెల్లిస్తారు.
సుకన్య సమృద్ధి యోజన అకౌంట్ను ఏ బ్యాంక్ లేదా పోస్టాఫీస్ లో అయినా ఓపెన్ చేయవచ్చు. అకౌంట్ ఓపెన్ చేశాక 15 ఏళ్ల పాటు అందులో డబ్బులు పొదుపు చేయవచ్చు. ఆడపిల్లకు 18 ఏళ్ల తరువాత పెళ్లి చేస్తే ఆ అకౌంట్లోని మొత్తాన్ని విత్డ్రా చేసి ఉపయోగించుకోవచ్చు. లేదా వారికి 21 సంవత్సరాల వయస్సు వచ్చాక ఆ మొత్తాన్ని విత్డ్రా చేయవచ్చు. ఇక ఈ అకౌంట్ను ఓపెన్ చేయాలంటే ఆడపిల్లకు 10 ఏళ్ల వయస్సు ఉండాలి. అయితే ఈ అకౌంట్ను కేవలం బ్యాంక్ లేదా పోస్టాఫీస్ బ్రాంచిలకు వెళ్లి మాత్రమే ఓపెన్ చేయాల్సి ఉంటుంది. ఆన్లైన్లో ఓపెన్ చేయలేరు.
ఏదైనా బ్యాంక్ లేదా పోస్టాఫీస్కు వెళ్లి ఈ అకౌంట్ ఓపెన్ చేస్తామని చెబితే వారు ఫాం ఇస్తారు. దాన్ని నింపి అవసరమైన కేవైసీ వివరాలను సమర్పించాలి. ఆడపిల్ల బర్త్ సర్టిఫికెట్, అడ్రస్ ప్రూఫ్, ఐడీ ప్రూఫ్, ఆమె తల్లిదండ్రులు లేదా సంరక్షకుల ధ్రువపత్రాలను సమర్పించాల్సి ఉంటుంది. దీంతో అకౌంట్ ఓపెన్ చేయవచ్చు.
ఆరంభంలో కనీసం రూ.250 చెల్లించాలి. గరిష్టంగా రూ.1.50 లక్షలు డిపాజిట్ చేయవచ్చు. తరువాత అందులో ఆ రెండు మొత్తాల మధ్య ఎంతైనా పొదుపు చేయవచ్చు. అకౌంట్ ఓపెన్ అయ్యాక పాస్బుక్ ఇస్తారు. అయితే ఇతర బ్యాంక్ అకౌంట్లలో నుంచి నెల నెలా కొంత మొత్తం సుకన్య సమృద్ధి యోజన అకౌంట్లో ఆటోమేటిక్గా క్రెడిట్ అయ్యేలా బ్యాంకింగ్ ఇన్స్ట్రక్షన్లను కూడా సెట్ చేసుకోవచ్చు. అందుకు ఇతర ఏదైనా బ్యాంకుకు చెందిన నెట్ బ్యాంకింగ్ కావాలి. దాంట్లో ఆ ఇన్స్ట్రక్షన్లను సెట్ చేసుకుంటే నెల నెలా నిర్దిష్ట మొత్తంలో సుకన్య సమృద్ధి యోజన అకౌంట్లోకి ఆటోమేటిగ్గా క్రెడిట్ అవుతుంది. దీంతో డబ్బును పొదుపు చేయవచ్చు.
ఇక ఏడాదిలో కనీసం రూ.250 అయినా డిపాజిట్ చేయాలి. లేదంటే అకౌంట్ను నిలిపివేస్తారు. ఈ క్రమంలో రూ.50 ఫైన్ చెల్లించి అకౌంట్ ను ఎప్పటిలా కొనసాగించవచ్చు. అయితే అకౌంట్ ఓపెన్ అయ్యాక 15 ఏళ్ల వరకు అకౌంట్ను ఎప్పుడైనా రీయాక్టివేట్ చేసుకోవచ్చు. కాకపోతే ఏడాదికి రూ.50 ఫైన్ చెల్లించాలి.