టీడీపీతో పొత్తు త‌ర్వాత జ‌న‌సేన‌కు చంద్ర‌బాబు ఎన్ని సీట్లు ఇస్తారంటూ ఒక్కటే చ‌ర్చ జ‌రిగింది. ముందు నుంచి కూడా జ‌న‌సేన‌కు 25కు మించి అసెంబ్లీ సీట్లు ఇవ్వ‌ర‌ని..ఇక ఎంపీ సీట్ల విష‌యానికి వ‌స్తే 2 లేదా మూడు మాత్ర‌మే ఉంటాయ‌ని అంద‌రూ అనుకున్నారు. అంద‌రూ అనుకున్న‌ట్టుగానే.. ఇంకా చెప్పాలంటే ఆ 25 సీట్లు కూడా బాబు పవన్ పార్టీకి ఇవ్వ‌లేదు. ఈ రోజు పొత్తులో భాగంగా తొలి లిస్ట్‌ను పవన్, చంద్ర‌బాబు క‌లిసి ప్ర‌క‌టించారు. జ‌న‌సేన 24 అసెంబ్లీ, 3 పార్ల‌మెంటు స్థానాల్లో పోటీ చేస్తుంద‌ని ప్ర‌క‌టించారు.
ఇవి త‌మ రేంజ్‌కు చాలా చాలా త‌క్కువ‌ని జ‌న సైనికులు తీవ్ర అస‌హ‌నంతో ఉన్నారు. కాపు, కాపు ఉప కులాల ఓట్లే ఏపీలో మొత్తం మీద 25 శాతం వ‌ర‌కు ఉంటాయ‌ని ప్ర‌చారం ఉంది. ఈ లెక్క‌న పవన్ మొత్తం 175 సీట్ల‌లో నాలుగో వంతు సీట్లు తీసుకున్నా 40 + ఇవ్వాల్సి ఉంటుంది. మ‌రీ ఘోరంగా ముష్టి వేసిన‌ట్టు చంద్ర‌బాబు త‌మ పార్టీకి 24 సీట్లు మాత్ర‌మే ఇచ్చార‌ని.. అయినా కూడా స్టేజ్ మీద పవన్ ఏదో సాధించిన‌ట్టు బిల్డ‌ప్ ఇవ్వ‌డం త‌మ‌కు ఏ మాత్రం మింగుడు ప‌డ‌డం లేద‌ని వారు వాపోతున్నారు.
అటు చిరంజీవి, ఇటు పవన్.. ఇంకా చెప్పాలంటే మెగాభిమానుల ఆత్మాభిమానం మొత్తం తాక‌ట్టు పెట్టి… ఇటు కులాన్ని కూడా బాబు ద‌గ్గ‌ర తాక‌ట్టు పెట్టుకుని పవన్ సాధించిన సీట్లు కేవ‌లం 24.. అస్స‌లు దీనిని తాము త‌ట్టుకోలేక‌పోతున్నామంటూ జ‌న‌సేన ఫ్యాన్స్ గ‌గ్గోలు మామూలుగా లేదు. చాలా మంది జ‌న‌సేన ఫ్యాన్స్ గ్రూపుల నుంచి లెఫ్ట్ అయిపోతున్నారు. ఇలాంటి చోట తాము ఉండ‌లేమ‌ని కామెంట్లు పెట్టి మ‌రీ బ‌య‌ట‌కు పోతున్నారు.
ఇప్ప‌టి వ‌ర‌కు పవన్ ప్యాకేజ్ స్టార్ అంటే తాము న‌మ్మ‌లేద‌ని.. కానీ ఇప్పుడు ప్యాకేజ్ స్టార్ పవన్ అంటే తాము న‌మ్మాల్సి వ‌స్తుంద‌ని జ‌న సైనికులే చెపుతున్నారు. ఏలూరులో సీటు ఆశించిన రెడ్డి అప్ప‌ల‌నాయుడు, త‌ణుకులో సీటు ఆశించిన విడివాడ రామ‌చంద్ర‌రావు వ‌ర్గాలు అయితే భ‌గ్గుమంటున్నాయి. అసలు ఇక్క‌డ టీడీపీ ఎలా గెలుస్తుందో చూస్తామ‌ని వారు స‌వాళ్లు రువ్వుతున్నారు. త‌ణుకులో చంద్ర‌బాబు సీటు ఇచ్చిన మాజీ ఎమ్మెల్యే ఆరిమిల్లి రాధాకృష్ణ… అయితే అక్క‌డ జ‌న‌సేన సీటు ఆశించిన విడివాడ రామ‌చంద్ర‌రావు కూడా క‌మ్మే.. జ‌న‌సేన క‌మ్మ నేత కోసం త‌మ పార్టీ క‌మ్మ నేత‌ను కూడా బాబు వ‌దులుకునేందుకు ఇష్ట‌ప‌డ‌లేద‌ని వారు మండిప‌డుతున్నారు.
అసలు ఇలాంటి పొత్తు ఉన్నా లేక‌పోయినా ఒక్కటే అని వారు ఫైర్ అవుతున్నారు. ఏదేమైనా జ‌న‌సేన‌కు బాబు ఇచ్చిన 24 సీట్లు ఆ పార్టీ కేడర్, నాయ‌కుల‌కు ఏ మాత్రం ఆమోద‌యోగ్యంగా లేదు. ఇలాంటి టైంలో మ‌రీ ఈ రెండుపార్టీల కేడర్ మ‌ధ్య ఓట్ల బ‌ద‌లాయింపు ఎలా జ‌రుగుతుంద‌న్న‌ది మాత్రం కాస్త సస్పెన్స్‌గానే క‌నిపిస్తోంది.