Khiladi: ర‌మేశ్ వ‌ర్మ ద‌ర్శ‌క‌త్వంలో మాస్ మ‌హారాజ్ ర‌వితేజ హీరోగా తెర‌కెక్కిన తాజా చిత్రం `ఖిలాడి`. ఏ స్టూడియోస్, పెన్ స్టూడియోస్ బ్యాన‌ర్ల‌పై హవీష్‌ కోనేరు, సత్యనారాయణ కోనేరు క‌లిసి నిర్మించిన ఈ చిత్రంలో మీనాక్షి చౌదురి, డింపుల్ హయాతి హీరోయిన్లుగా న‌టించారు. అలాగే ముఖ్య‌మైన పాత్ర‌ల్లో యాక్ష‌న్ కింగ్ అర్జున్ స‌ర్జా, అనసూయ, ఉన్నిముకుందన్‌లు క‌నిపించ‌బోతున్నారు.
ఇప్ప‌టికే సెన్సార్ పూర్తి చేసుకుని యూ/ఏ సర్టిఫికెట్ ను తెచ్చుకున్న ఈ చిత్రం ఫిబ్ర‌వ‌రి 11న గ్రాండ్‌గా విడుద‌ల కాబోతోంది. అయితే క్రాక్ వంటి భారీ హిట్‌తో ర‌వితేజ ఫుల్ ఫామ్‌లోకి వ‌చ్చేయ‌డంతో.. ఖిలాడి చిత్రానికి సూప‌ర్‌గా బిజినెస్ జ‌రిగింది. తాజాగా ఈ సినిమా ప్రీ రిలీజ్ బిజినెస్ లెక్క‌లు బ‌య‌ట‌కు వ‌చ్చాయి.
నైజాంలో రూ. 8.10 కోట్లు, సీడెడ్‌లో రూ. 3.60 కోట్లు, ఆంధ్రా రూ.11 కోట్లు, మిగతా ప్రాంతాలు రూ. 2 కోట్లు, ఓవ‌ర్సీస్‌లో రూ. కోటి మేర బిజినెస్ జ‌ర‌గ‌గా.. ప్ర‌పంచ‌వ్యాప్తంగా ఈ చిత్రం రూ.25.70 కోట్ల ప్రీ రిలీజ్ బిజినెస్ చేసింది. దీంతో రేపు థియేట‌ర్స్‌లోకి దిగుతున్న ఖిలాడి.. సూప‌ర్ హిట్ అవ్వాలంటే రూ. 26.50 కోట్లను రాబ‌ట్టాల్సి ఉంటుంది. మ‌రి ర‌వితేజ ఈ ఫీట్‌ను అందుకుని మ‌రో హిట్‌ను ఖాతాలో వేసుకుంటాడో.. లేదో.. చూడాలి.
కాగా, కొన్ని వందల కోట్ల అక్రమ డబ్బు చుట్టూ సాగ‌బోతున్న ఈ చిత్రంలో ర‌వితేజ రెండు పాత్ర‌ల్లో క‌నిపించ‌నున్నాడు. అందులో ఒక పాత్ర సూప‌ర్ ఫన్నీగా ఉండగా.. మరొక రోల్ ఫుల్ వైలెంట్‌గా ఉంటుంది. ఇక ఈ చిత్రానికి రాక్ స్టార్ దేవిశ్రీ ప్ర‌సాద్ సంగీతం అందించారు.