ఇంగ్లాండ్ మేటి ఫాస్ట్ బౌలర్ జోఫ్రా ఆర్చర్ తన సొంత దేశమైన వెస్టిండీస్ తో జరుగుతున్న టెస్టు సిరీస్ లో రెండో టెస్టుకు అకస్మాత్తుగా దూరమయ్యాడు. కరోనా నేపథ్యంలో మళ్లీ ఈ టెస్ట్ సిరీస్ ద్వారా క్రికెట్ మొదలు కాగా ఇరు దేశాల ఆటగాళ్ళు, యాజమాన్యం సిబ్బంది మరియు అంపైర్లతో సహా అంతా కొన్ని ప్రోటోకాల్స్ ప్రకారం ‘బబుల్’ పద్ధతినే పాటించారు.
అయితే ఆర్చర్ మాత్రం ఈ బబుల్ పద్ధతికి ఇబ్బంది కలిగించి ఇంగ్లండ్ విధించిన కొన్ని బయో సెక్యూరిటీ ప్రోటోకాల్స్ ను ఉల్లంఘన చేసినందువల్ల అతనిని రెండవ టెస్టు టీమ్ నుండి తప్పించారు. మరో ఐదు రోజుల పాటు ఆర్చర్ ఐసోలేషన్ లో ఉండవలసి ఉంది. ఆ తర్వాత మూడో టెస్ట్ ప్రాక్టీస్ సమయానికి అతనికి ఫలితం నెగిటివ్ గా ఉన్నప్పుడు అతను ఆ టెస్టులో పాల్గొనడానికి అవకాశం ఉంది.
ఇదిలా ఉండగా ఆర్చర్ మాట్లాడుతూ తాను కోడ్ ఉల్లంఘించి బయటికి వెళ్లినందుకు చింతిస్తున్నానని…. అతను తన ప్రాణాలతో పాటు తన తోటి ఆటగాళ్ల ప్రాణాలను మరియు టీం మేనేజ్మెంట్ ప్రాణాలను కూడా రిస్క్ లో పెట్టాను అని చెప్పి బాధపడ్డాడు. ఇకపై ఇటువంటి పరిణామాలు తన వల్ల రాబోవని హామీ ఇచ్చాడు.
దాదాపు నాలుగు నెలలు క్రికెట్ లేక మొహం వాచిపోయిన క్రికెట్ అభిమానులకు 50 ఓవర్ల వరల్డ్ కప్ విన్నర్ ఇంగ్లాండ్ మరియు పొట్టి ప్రపంచ కప్ చాంపియన్స్ వెస్టిండీస్ ల మధ్య జరిగుతున్న టెస్ట్ సిరీస్ లోని మొదటి టెస్టు ఎంతో ఉత్సాహాన్ని ఇచ్చింది. 5వ రోజు వరకు ఉత్కంఠగా జరిగిన ఈ మ్యాచ్ లో వెస్టిండీస్ ఆతిథ్య ఇంగ్లాండ్ పై ఘన విజయం సాధించింది. ఇలాంటి పరిస్థితుల్లో ఆర్చర్ రెండో టెస్టుకు దూరం కావడం ఇంగ్లండ్ కు పెద్ద దెబ్బ అనే చెప్పాలి.