Ramdev Baba Vs IMA: వ్యాఖ్యలను ఉపసంహరించుకున్న రాందేవ్ బాబా..! వివాదం సద్దుమణిగినట్లేనా..! ఐఎంఎ ఏమంటుందో..!?

Ramdev Baba Vs IMA: అల్లోపతి వైద్య విధానంపై యోగా గురువు రాందేవ్ బాబా చేసిన వివాదాస్పద వ్యాఖ్యలు తీవ్ర దుమారాన్ని రేపిన సంగతి తెలిసిందే. అల్లోపతి వైద్య రంగాన్ని అవహేళన చేసేలా, కించపరిచేలా రాందేవ్ బాబా మాట్లాడటం, దానికి సంబంధించిన వీడియో సోషల్ మీడియాలో సర్క్యులేట్ అవ్వడం జరిగింది. దీనిపై  ఇండియన్ మెడికల్ అసోసియేషన్ (ఐఎంఏ) తీవ్రంగా స్పందించింది. ఆయనపై అంటు వ్యాధుల చట్టం కింద చర్యలు తీసుకుని ప్రాసిక్యూట్ చేయాలని కూడా ఐఎంఏ డిమాండ్ చేసింది. దీనిపై ఆయనకు లీగల్ నోటీసులు కూడా పంపింది.

అయితే దీనిపై కేంద్ర ఆరోగ్య శాఖ మంత్రి హర్షవర్థన్ స్పందిస్తూ రాందేవ్ బాబా వ్యాఖ్యలను ఖండించడంతో పాటు రాందేవ్ బాబా ఆ వ్యాఖ్యలను వెనక్కు తీసుకోవాలని సూచించారు. రాందేవ్ బాబాకు వ్యాఖ్యలను ఉపసంహరించుకోవాలంటూ లేఖ కూడా రాశారు. కరోనా వారియర్స్ ను అవమానించేలా మీ ప్రకటన ఉంది. వారియర్స్ సెంటిమెంట్ ను దెబ్బతీసేవా ఉంది అని హర్షవర్థన్ తన లేఖలో పేర్కొన్నారు. దేశంలో ఎంతో మంది ప్రాణాలను అల్లోపతి మందులు కాపాడాయని గుర్తు చేస్తూ అలాంటి మందులు లక్షల మంది ప్రాణాలు పోవడానికి కారణమయ్యాయని అనడం దురదృష్టకరమని అన్నారు. తక్షణం ఆ వ్యాఖ్యలను వెనక్కి తీసుకోవాలని హర్షవర్థన్ రాందేవ్ బాబాకు సూచించారు.

దీనిపై ఆదివారం రాత్రి ట్విట్టర్ వేదికగా రాందేవ్ బాబా స్పందించారు. కేంద్ర మంత్రి హర్షవర్థన్ లేఖ తనకు చేరిందన్నారు. దాన్ని తాను గౌరవిస్తున్నాననీ, ఈ మొత్తం వివాదాస్పద వ్యవహారానికి సంబందించి తన వ్యాఖ్యలను వెనక్కు తీసుకుంటున్నాననీ పేర్కొన్నారు. రాందేవ్ బాబా తన వ్యాఖ్యలకు చింతిస్తున్నట్లు గానీ క్షమాపణ చెప్పడం గానీ చేయలేదు. కేవలం వ్యాఖ్యలను వెనక్కు తీసుకుంటున్నట్లు పేర్కొన్నారు. అయితే ఇంతటితో ఈ వ్యవహారం సద్దుమణిగినట్లేనా లేక ఐఎంఏ ఆయనపై చర్యలకు పట్టుబడుతుందా అనేది వేచి చూడాలి.

I received Union Health Minister Harsh Vardhan's letter, in respect of this, I withdraw my statement regretting this entire controversy: Ramdev pic.twitter.com/2PbyWXFx3F

— ANI (@ANI) May 23, 2021