YSRCP: రాష్ట్రంలో తెలుగుదేశం పార్టీ పరిస్థితి ఘోరంగా తయారైంది. ఇటీవల జరిగిన స్థానిక సంస్థల ఎన్నికల్లో, ఆ తరువాత జరిగిన తిరుపతి పార్లమెంట్ ఎన్నికల్లో ఏ మాత్రం సత్తా చూపించలేకపోయింది. ఇక టీడీపీలో యాక్టివ్ గా ఉన్న మాజీ మంత్రులు, నేతలపై కేసులు నమోదు కావడం, అరెస్టులు చూస్తునే ఉన్నాం. రాజకీయంగా నియోజకవర్గాల్లో, జిల్లాలో చక్రం తిప్పినవాళ్లు నేడు సైలెంట్ గా ఉండాల్సిన పరిస్థితులు నెలకొన్నాయి. కేసులు, ఆర్థికపరమైన ఇబ్బందులు తలెత్తుతున్నాయి. ఈ నేపథ్యంలో రాయలసీమకు చెందిన టీడీపీ మాజీ మంత్రి తిరిగి సొంత గూటికి చేరే ప్రయత్నాలు ప్రారంభించారని వార్తలు వస్తున్నాయి.
Read More: Nama Nageswararao: టీఆర్ఎస్ పార్లమెంటరీ నేత నామాకు మరో సారి షాక్ ఇచ్చిన ఈడీ..!!
2014 ఎన్నికల్లో ఆళ్లగడ్డ అసెంబ్లీ నియోజకవర్గం నుండి భూమా అఖిల ప్రియ వైసీపీ అభ్యర్థిగా విజయం సాధించారు. అనంతరం టీడీపీలో చేరారు. చంద్రబాబు పర్యాటక శాఖ మంత్రి పదవి ఇచ్చారు. దివంగత నేత భూమా నాగిరెడ్డి కుటుంబానికి ఆళ్లగడ్డ, నంద్యాల నియోజకవర్గంలో బలమైన క్యాడర్ ఉంది. అయినప్పటికీ 2019 ఎన్నికల్లో ఆళ్లగడ్డ నుండి టీడీపీ తరపున పోటీ చేసిన భూమా అఖిలప్రియ వైసీపీ ఫ్యాన్ గాలిలో పరాజయం పాలైయ్యారు. తండ్రి భూమా నాగిరెడ్డి మరణానంతరం అఖిలప్రియ అనేక ఇబ్బందులు ఎదుర్కొంటున్నారు. రాజకీయ ఇబ్బందులు మాత్రమే కాకుండా ఆర్థికపరమైన ఇబ్బందులు కూడా చుట్టుముట్టాయి. ఇటీవల బోయిన్‌పల్లి కిడ్నాప్ కేసులో అరెస్టు అయి జైలుకు కూడా వెళ్ళారు. అనంతరం బెయిల్ పై విడుదల అయ్యారు. ఆమె ఆ కేసులో అరెస్టు అయిన సమయంలో టీడీపీ ముఖ్యనేతలు ఎవరూ పరామర్శించిన దాఖలాలు లేవు. దీంతో ఆ పార్టీపై అసంతృప్తితో ఉన్నారనీ, బెయిల్ పై బయటకు రాగానే వైసీపీలో చేరతారని జోరుగా ప్రచారం కూడా జరిగింది.
అయితే ఇప్పుడు వైసీపీలో చేరడానికి ప్రయత్నాలు చేస్తున్నారు. టికెట్ పై స్పష్టమైన హామీ వస్తే ముందడుగు వేయాలని భావిస్తున్నారు. వైసీపీ పెద్దలతో ఇప్పటికే మంతనాలు కూడా ప్రారంభించినట్లు ప్రచారం జరుగుతోంది. వైసీపీలో ఉన్న మేన మామ ఎస్వీ మోహనరెడ్డి ద్వారా అఖిల ప్రియ మంతనాలు జరుపుతున్నారని తెలుస్తోంది. తమ కుటుంబానికి రాజకీయంగా పట్టు ఉన్న ఆళ్లగడ్డ నియోజకవర్గ టికెట్ హామీ లభిస్తే నంద్యాల విషయంలో రాజీపడేందుకు సిద్ధమని సంకేతాలు ఇచ్చినట్లు తెలుస్తోంది. అఖిల ప్రియకు వైసీపీ నుండి స్పష్టమైన హామీ లభిస్తుందా? అఖిల ప్రియ విషయంలో వైసీపీ అధినేత, సీఎం వైఎస్ జగన్ ఏ విధంగా స్పందిస్తారు ? అన్నది వేచి చూడాలి.