whatsapp: మీరు వాట్సాప్ వాడుతున్నారా? అయితే బహుపరాక్ మిత్రులారా. ఎందుకంటే వాట్సాప్ ఒకే నెలలో దాదాపుగా 1700000 అకౌంట్లను బ్యాన్ చేసింది. విషయంలోకి వెళితే, గత సంవత్సరం అనగా 2021 నవంబర్ నెలలో ఏకంగా 17.5 లక్షలకు పైగా అకౌంట్లు బ్యాన్ చేసినట్టు తన కంప్లియెన్స్ రిపోర్టులో పేర్కొంది. ఈ కాలంలో తమ సంస్థకు సుమారుగా 602 ఫిర్యాదులు వచ్చినట్టు తెలిపింది. నిబంధనలు ఉల్లంఘిస్తోన్న ఈ ఇండియన్ అకౌంట్లను +91 ఫోన్ నెంబర్ ద్వారా గుర్తిస్తున్నట్టు పేర్కొంది. ఐటీ నిబంధనలు 2021 ప్రకారం, తాము నవంబర్ నెలకు సంబంధించిన రిపోర్టును పబ్లిష్ చేశామని వాట్సాప్ అధికార ప్రతినిధి ఒకరు చెప్పారు.
ఈ కారణం చేతనే వారు ఆ అకౌంట్లను బ్యాన్ చేశారట!
యూజర్లకు తమ ప్లాట్‌ఫామ్‌ను సురక్షితంగా వాడేందుకు గాను తాము ఎక్కువగా ఆర్టిఫిషియల్ ఇంటెలిజెన్స్, డేటా సైన్స్ వాడుతున్నట్టు వాట్సాప్ తెలిపింది. గత సంవత్సరం అక్టోబర్ నెలలో కూడా వాట్సాప్ 20 లక్షల అకౌంట్లను బ్యాన్ చేసిన మాట తెలిసినదే. వాట్సాప్‌కు దేశవ్యాప్తంగా 40 కోట్లకు పైగా యూజర్లున్నారు. వాట్సాప్ బ్యాన్ చేసిన ఈ అకౌంట్ల ద్వారా యూజర్లు బల్క్ మెసేజ్‌లను పంపుతున్నట్టు వాట్సాప్ గుర్తించింది. అందుకే బల్క్‌గా మెసేజ్‌లు పంపే అకౌంట్లపై వాట్సాప్ చర్యలు తీసుకుంది.
సోషల్ మీడియాకు ప్రభుత్వానికి మధ్య జరిగిన ఒప్పందం ఇదే..
ఇక గత ఏడాదంతా సోషల్ మీడియాలకు, ప్రభుత్వానికి మధ్య ఒక యుద్ధమే జరిగిందని చెప్పుకోవాలి. కేంద్ర ప్రభుత్వం తీసుకొచ్చిన వ్యక్తిగత డేటా నిబంధనల విషయంలో, సోషల్ మీడియా కంపెనీలు అభ్యంతరాలు వ్యక్తం చేయడం మనం చూసాం. పలు సోషల్ మీడియా కంపెనీలు, OTT కంపెనీలను మరింత పారదర్శకంగా మార్చేందుకే కేంద్ర ప్రభుత్వం గతేడాది ఫిబ్రవరిలో కొన్ని నిబంధనలను తీసుకొచ్చింది. ఈ కోవలోనే వాట్సాప్ ఇలాంటి నిర్ణయాలు తీసుకుందని పలువురు కార్పొరేట్ దిగ్గజాలు అభిప్రాయపడుతున్నారు.