Bheemla nayak: పవర్ స్టార్ పవన్ కళ్యాణ్ ఇప్పటి వరకు ఒక్క పాన్ ఇండియన్ సినిమా చేయలేదు. వకీల్ సాబ్ సినిమాతో రీ ఎంట్రీ ఇచ్చిన పవన్ ఆ సినిమాను అప్పటికే హిందీలో, తమిళంలో చూసేశారు కాబట్టి కేవలం తెలుగులో మాత్రమే రిలీజ్ చేశారు. అయితే, ప్రముఖ నిర్మాత ఏ ఎం రత్నం భారీ బడ్జెట్‌తో నిర్మిస్తున్న హరిహర వీరమల్లు చిత్రం 5 భాషలలో రిలీజ్ చేస్తున్నట్టు ఫస్ట్ గ్లింప్స్‌తో మేకర్స్ ప్రకటించి సర్‌ప్రైజ్ చేశారు. తెలుగుతో పాటుగా హిందీ, తమిళం, కన్నడ, మలయాళంలో హరిహర వీరమల్లు రాబోతోంది.
అంటే పవన్ కళ్యాణ్ ఫస్ట్ పాన్ ఇండియన్ సినిమా వీరమల్లు అని అందరూ భావించారు. కానీ, తాజాగా వినిపిస్తున్న టాక్ ప్రకారం అంతకముందే పవన్ నటించిన చిత్రాన్ని పాన్ ఇండియన్ సినిమాగా బహుభాషలలో రిలీజ్ చేయనున్నట్టు వార్తలు వస్తున్నాయి. రానా దగ్గుబాటితో కలిసి పవన్ కళ్యాణ్ నటిస్తున్న ఈ సినిమాలో నిత్యా మీనన్ పవన్ జోడీగా అలరించబోతోంది. అలాగే, రానా జోడీగా సంయుక్త మీనన్ సందడి చేయనుంది. ఇక ఇప్పటికే మాటల మాంత్రీకుడు త్రివిక్రమ్ శ్రీనివాస్ అందిస్తున్న డైలాగ్స్ ఎంత పవర్‌ఫుల్‌గా ఉండబోతున్నాయో టీజర్స్‌తో ఓ క్లారిటీ వచ్చేసింది.
Bheemla nayak: పాన్ ఇండియన్ సినిమాగా మేకర్స్ పలు భాషల్లో రిలీజ్..!
ఇక భీమ్లా నాయక్ సినిమాను ఆల్రెడీ మలయాళం సినిమా అయ్యప్పనుమ్ కోషియుమ్ తెలుగు రీమేక్‌గా నిర్మిస్తున్నారు కాబట్టి మలయాళంలో రిలీజ్ చేస్తారా అనేది కాస్త అనుమానమే. మిగతా నాలుగు భాషలలో మాత్రం కనీసం డబ్బింగ్ వెర్షన్ అయినా రిలీజ్ చేసేందుకు ప్లాన్ చేస్తున్నట్టు టాక్ వినిపిస్తోంది. పవన్ క్రేజ్‌ను బట్టి ఇదే సినిమాను మలయాళంలో డబ్బింగ్ చేసి విడుదల చేసినా చెప్పలేము. చూడాలి మరి ఈ సినిమాను నిజంగా పాన్ ఇండియన్ సినిమాగా మేకర్స్ పలు భాషల్లో రిలీజ్ చేసే వార్తల్లో నిజమెంత ఉందో. కాగా, ఈ సినిమాకు సాగర్ కె చంద్ర దర్శకత్వం వహిస్తున్నాడు. ఎస్ ఎస్ థమన్ మ్యూజిక్ డైరెక్టర్.