Legend: నటసింహం నందమూరి బాలకృష్ణ సినీ కెరీర్ లో ఎన్నో అద్భుతమైన చిత్రాలు ఉన్నాయి. అందులో లెజెండ్ మూవీ కూడా ఒకటి. బోయపాటి శ్రీను డైరెక్ట్ చేసిన ఈ చిత్రంలో రాధిక ఆప్టే, సోనాల్ చౌహాన్ హీరోయిన్స్ గా నటించారు. అలాగే జగపతిబాబు ఈ సినిమాతోనే విలన్ గా తన సెకండ్ ఇన్నింగ్స్ ప్రారంభించారు. 14 రీల్స్ ఎంటర్టైన్మెంట్ మరియు వారాహి చలనచిత్ర బ్యానర్లపై రామ్ ఆచంట, గోపీచంద్ ఆచంట, అనిల్ సుంకర, సాయి కొర్రపాటి సంయుక్తంగా నిర్మించిన ఈ చిత్రానికి దేవి శ్రీ ప్రసాద్ మ్యూజిక్ డైరెక్టర్ గా పని చేశాడు.
2014 మార్చి 28న విడుదలైన లెజెండ్ మూవీ బాక్సాఫీస్ వద్ద సంచలన విజయాన్ని నమోదు చేసింది. తొలి ఆట నుంచే హిట్ టాక్ సొంతం చేసుకుని కాసుల వర్షాన్ని కురిపించింది. బోయపాటి శ్రీను, బాలకృష్ణ కాంబినేషన్ లో వచ్చిన రెండో సినిమా ఇది. అప్పటికే వీరిద్దరూ సింహా చిత్రానికి పని చేశారు. 2010లో రిలీజ్ అయిన సింహా ఆల్ టైమ్ బ్లాక్ బస్టర్ గా నిలిచింది. అయితే సింహా తర్వాత ఆ స్థాయి హిట్ బాలయ్య ఖాతాలో పడలేదు.
పరమ వీర చక్ర, అధినాయకుడు, ఊ కొడతారా? ఉలిక్కి పడతారా?, శ్రీమన్నారాయణ వంటి చిత్రాలు బాలయ్యకు షాకుల మీద షాకులు ఇచ్చారు. దాంతో ఆయన మళ్లీ బోయపాటి శ్రీనుకే ఛాన్స్ ఇచ్చారు. అలా వీరి కలయికలో భారీ అంచనాల నడుమ విడుదలైన లెజెండ్ మూవీ సెన్సేషనల్ హిట్ గా నిలిచింది. కడప జిల్లా ప్రొద్దుటూరులోని అర్చన థియేటర్లో 1000 రోజులు ఆడింది.
అంతకుముందు సూపర్ స్టార్ రజనీకాంత్ నటించిన చంద్రముఖి సినిమా తమిళనాడులోని ఓ థియేటర్ లో 891 రోజులు రన్ ను పూర్తి చేసుకుని రికార్డు సృష్టించగా.. ఆ రికార్డును లెజెండ్ సినిమా బ్రేక్ చేసింది. అలాగే ఫుల్ రన్ లో లెజెండ్ మూవీ వరల్డ్ వైడ్ గా రూ. 40 కోట్లకు పైగా షేర్ వసూళ్లను సాధించింది. కేవలం తెలుగు రాష్ట్రాల్లోనే రూ. 34.09 కోట్ల షేర్ రాబట్టి బాక్సాఫీస్ వద్ద దుమ్ము దులిపేసింది. ఇకపోతే లెజెండ్ మూవీ థియేటర్స్ లో విడుదలై గురువారంతో 10 ఏళ్లు పూర్తి చేసుకుంది. ఈ సందర్భంగా మార్చి 30న లెజెండ్ ను రీ రిలీజ్ చేసేందుకు సన్నాహాలు చేస్తున్నారు.
అలాగే గురువారం రాత్రి హైదరాబాద్ లో లెజెండ్ మూవీ టీమ్ 10 ఇయర్స్ సెలబ్రేషన్స్ చేసుకున్నారు. ఈ మేరకు ఓ వేడుకను నిర్వహించారు. హీరో బాలకృష్ణ, డైరెక్టర్ బోయపాటి శ్రీను, హీరోయిన్ సోనాల్ చౌహాన్ మరియు నిర్మాతలతో సహా మరికొందరు ఈ వేడుకకు హాజరయ్యారు. ఈ వేడుకలో బాలయ్య మాట్లాడుతూ.. `రికార్డులు నాకు కొత్త కాదు. సృష్టించాలన్నా నేనే, తిరగరాయాలన్నా నేనే. సినిమా అంటే కేవలం వినోదం మాత్రమే కాదు బాధ్యత. కొన్ని సినిమాలు చరిత్రలో నిలిచిపోతుంటాయి. సింహం, లెజెండ్, అఖండ అలాంటివే. ఈ మధ్య చేసిన వీర సింహారెడ్డి, భగవంత్ కేసరి చిత్రాలు కూడా నాలో కసిని పెంచాయి. ఇలాంటి మంచి సినిమాలు ఇస్తే మరిన్ని చేయమని ప్రేక్షకులు వెన్ను తట్టి ప్రోత్సహిస్తారు` అంటూ ఎంతో ఉత్సాహంగా ప్రసంగించారు.
Aavesham OTT: డిజిటల్ స్ట్రీమింగ్ డేట్ ను కన్ఫామ్ చేసుకున్న ఆవేశం మూవీ.. ఈ రూ. 150 కోట్ల మూవీ స్ట్రీమింగ్ ఎక్కడంటే..!