అమరావతి: పెద్దల సభలో సభ్యుడుగా ఉన్న వైసిపి రాజ్యసభ్య సభ్యుడు విజయసాయిరెడ్డి వ్యవహార శైలి ఆ స్థాయిలో లేదని టిడిపి నేత వర్ల రామయ్య విమర్శించారు.
చంద్రబాబుపై కృష్ణమ్మ ఆగ్రహించిందంటూ విజయసాయిరెడ్డి చేసిన విమర్శలపై వర్ల రామయ్య ట్విట్టర్ వేదికగా స్పందిస్తూ ఆయనపై ప్రతి విమర్శలు చేశారు.
విజయసాయిరెడ్డి అన్ని అబద్దాలు, అసత్యాలు మాట్లాడుతూ చంద్రబాబును అవహేళన చేస్తున్నారని వర్ల దుయ్యబట్టారు. లింగమనేని గెస్ట్ హౌస్‌లో చంద్రబాబు అద్దెకు ఉంటున్నారనీ, అలాంటప్పుడు ఆ ఇల్లు నిర్మించిన పాపం చంద్రబాబుది ఎలా అవుతుందని వర్ల ప్రశ్నించారు. దీనికి కృష్ణమ్మ ఆగ్రహించిందని విజయసాయి అనడం విడ్డూరంగా ఉందని వర్ల పేర్కొన్నారు.