Nimmagadda: ఓ బ్యాట్స్ మెన్ సొంత టీమ్ తో.. ప్రత్యర్థి టీమ్ తో తలబడుతూ.. ఆటలో తడబడుతూ.. వివాదాలకు బిందువవుతూ.. ఎలాగోలా సమయమొచ్చే సరికి చివరికి రిటైర్ అయ్యాడు… కానీ వెళ్తా, వెళ్తా పిచ్ పై ఒక బాంబు వేసి వెళ్ళాడు. ఆ బాంబు ఇప్పుడు పేలింది. ఆ తర్వాత వచ్చిన బ్యాట్స్ మెన్ కి తగిలింది. ఆ పిచ్ కి తగిలింది. ఇదీ నిమ్మగడ్డ రమేష్ కుమార్ వ్యవహారం. ఎన్నికల కమీషనర్ గా చివరి రోజుల్లో ఆయన చేసిన ఓ పని, ఆయన తీసుకున్న ఓ నిర్ణయం ఇప్పుడు ప్రభుత్వ నిర్ణయం కోర్టులో ఓడిపోయేలా చేసింది..! రిటైర్ అయ్యాక కూడా నిమ్మగడ్డ కొట్టిన స్ట్రోక్ బౌండరీ దాటింది..!!
Nimmagadda: సుప్రీమ్ ఏం చెప్పింది..!? ఏపీ ఏం చేసింది..!?
ఈరోజు ఏపీ హైకోర్టులో ఏపీ ప్రభుత్వానికి ఎదురుదెబ్బ తగలడానికి ఒక్కటే మేజర్ కారణం. ఎన్నికల కోడ్ కనీసం నాలుగు వారాలు అమలవ్వాలి.. ఆ తర్వాత ఎన్నికలు జరగాలి. ఇవీ సుప్రీమ్ మార్గదర్శకాలు. కానీ వీటిని పట్టించుకోకుండా ఏపీ రాష్ట్ర ఎన్నికల కమీషనర్ నీలం సాహ్ని బాధ్యతలు స్వీకరించిన మొదటి రోజునే ఎన్నికల నోటిఫికేషన్ ఇచ్చారు. దీంతో సుప్రీం మార్గదర్శకాలు పాటించలేదని హైకోర్టు స్టే ఇచ్చింది. అంతకు ముందు రాష్ట్రంలో పంచాయతీ ఎన్నికల సమయంలో రాష్ట్రంలో 50 రోజులకు పైగా ఎన్నికల కోడ్ అమల్లో ఉంది. జనవరి చివరి వారంలో వచ్చిన ఎన్నికల కోడ్ మార్చి 15 వరకు ఉంది. సో.. పంచాయతీ ఎన్నికలకు, మున్సిపల్ ఎన్నికలకు ఇబ్బంది రాలేదు.
నిమ్మగడ్డ ఎన్నికల కోడ్ ఎందుకు ఎత్తేసినట్టు..!?
పంచాయతీ ఎన్నికల షెడ్యూల్ వచ్చింది. అప్పుడే రాష్ట్రంలో ఎన్నికల కోడ్ కూసింది. ఆ తర్వాత మున్సిపల్ ఎన్నికలకు కొనసాగింది. ఇవి పూర్తయిన వెంటనే కోడ్ ఎత్తేసారు. కానీ అప్పటికే “పరిషత్ ఎన్నికల కథ కోర్టులో ఉంది. రేపో, మాపో షెడ్యూల్ అనేట్టుగా ఉంది. మొత్తం సిద్ధమైంది. నిజానికి కోడ్ ఎత్తేయాల్సిన అవసరమే లేదు” కానీ నిమ్మగడ్డ రమేష్ కుమార్ రాష్ట్రంలో ఎన్నికల కోడ్ ఎత్తేసారు. దీంతో ఏప్రిల్ ఒకటిన ఇచ్చిన నోటిఫికేషన్ మేరకు.. కేవలం 8 రోజులు మాత్రమే కోడ్ అమల్లో ఉన్నట్టు. ఇది చెల్లదు. “ఒకవేళ నిమ్మగడ్డ రమేష్ కుమార్ నాడు ఎన్నికల కోడ్ ఎత్తేయకపోతే.. ఇప్పుడు ఏమాత్రం సమస్య వచ్చేది కాదు. ఈజీగా ఎన్నికల ప్రక్రియ ముగిసిపోయేది. అన్నీ తెలిసి.., తాను రిటైర్ అయిన వెంటనే వచ్చే కొత్త ఎన్నికల కమీషనర్ ఇలా నోటిఫికేషన్ ఇస్తారని తెలిసి.. సుప్రీం మార్గదర్శకాల ప్రకారం అది చెల్లదని తెలిసి.. తాను సింపుల్ గా కోడ్ ఎత్తేసి.. వెళ్లిపోయారు. అలా తన తెలివిని చూపించారు. బ్యాట్స్ మెన్ గా తన చివరి స్ట్రోక్ కొట్టారు. ఆ స్ట్రోక్ ఇప్పుడు బౌండరీని దాటింది. పిచ్ లో బాంబు వేసి వెళ్లారు. ఆ బాంబు ఇప్పుడు పేలింది. పాపం నీలం సాహ్నికి తగిలింది..!!
