తెలుగుదేశం పార్టీ నాయకులలో చాలామందికి జూనియర్ ఎన్టీఆర్ వచ్చి పార్టీ పగ్గాలు చేపట్టాలని మనసులో కోరిక ఉందన్న వార్తలు మనం ఎప్పటినుండో వింటున్నాం. అయితే ఎన్టీఆర్ ఇప్పటి వరకు అసలు ఆ విషయంపై స్పందించింది లేదు. ఎప్పుడు ఏ ఇంటర్వ్యూలో ఆ విషయం అడిగినా కూడా దాటవేస్తూ ఉంటారు. విధి…. దేవుడు అంటూ…. అవి ఎలా చూపిస్తే అలా నడుచుకుంటానని చెబుతుంటారు.
సరిగ్గా చెప్పాలంటే తెలుగుదేశం పార్టీ పగ్గాలు చేపట్టేందుకు ఇంతకంటే మంచి సమయం ఎన్టీఆర్ కు దొరకదు. పార్టీ కొత్త గాలిని కోరుకుంటోంది. చంద్రబాబు వ్యూహాలు బెడిసి కొడుతున్నాయి. అయితే ఈ సమయంలో ఎన్టీఆర్ రాకపై అయితే తెలుగుదేశం నాయకులు కామెంట్లు చేయాలి కానీ ఏకంగా వైసీపీ మంత్రి అది కూడా జగన్ పరమభక్తుడు అతని పొలిటికల్ ఎంట్రీ పై క్లారిటీ ఇవ్వడం అనేది ఇక్కడ విశేషం.
ఆంధ్రప్రదేశ్ పౌరసరఫరాల శాఖా మంత్రి కొడాలి నాని తాజాగా ఒక మీడియా సంస్థకు ఇచ్చిన ఇంటర్వ్యూలో మాట్లాడుతూ కచ్చితంగా ఎన్టీఆర్ రాజకీయ రంగప్రవేశం ఉంటుందని అయితే అతను తెలుగుదేశం పార్టీనే నడిపిస్తారా లేదా కొత్త పార్టీని పెట్టుకుంటారా అన్నది తెలియాల్సి ఉందని నాని అనడం గమనార్హం. నాని ఎన్టీఆర్ కు మంచి మిత్రుడు కూడా. అయితే అప్పుడు ఉన్న పరిస్థితులను బట్టి అతను టిడిపిలో చేరేది లేదా కొత్త పార్టీ పెట్టేది లేనిది ఆలోచించుకుంటాడు కానీ మొదట్లో అతని పొలిటికల్ జర్నీ మాత్రం మొదటి సజావుగా సాగే ప్రసక్తే లేదని నాని అన్నారు.
చంద్రబాబు-లోకేష్ రూపంలో తండ్రీకొడుకుల ద్వయం ఎన్టీఆర్ ను రాజకీయంగా ఎదగనివ్వకుండా అడ్డుపడతారని నాని తన అభిప్రాయాన్ని వ్యక్తం చేశారు. అంతే కాకుండా మరింత ఘాటుగా మాట్లాడుతూ లోకేష్ కి కనుక అసెంబ్లీ మెట్లు ఎక్కాలి అని ఉంటే కేవలం ఎన్టీఆర్ నాయకత్వంలో ఎమ్మెల్యేగా పోటీ చేస్తేనే అతనికి అది సాధ్యపడుతుందని చెప్పడం విశేషం. మరి నాని చెప్పినట్టు ఎన్టీఆర్ పొలిటికల్ ఎంట్రీ ఎప్పుడు ఉంటుందని నందమూరి అభిమానులు వేయి కళ్ళతో ఎదురు చూస్తున్నారు.
