Revanth Reddy: తెలంగాణ కాంగ్రెస్ ఎంపీ కోమటిరెడ్డి వెంకటరెడ్డి మరోసారి టిపిసిసి రేవంత్ రెడ్డిపై తనదైన శైలిలో కామెంట్లు చేశారు.రేవంత్ రెడ్డి చిన్న పిల్లాడని.. అతడి గురించి తన వద్ద మాట్లాడవద్దని అనేశారు.అంతేగాక తెలంగాణలో కాంగ్రెస్‌ను ముందుకు నడిపే సమర్థవంతమైన నేత పార్టీలో లేరని వెంకట్ రెడ్డి వ్యాఖ్యానించారు.కోమటిరెడ్డి తాజా వ్యాఖ్యలను విశ్లేషిస్తే తనకు పీసీసీ అధ్యక్ష పదవి ఇవ్వకపోవడంపై ఆయన ఇంకా కోపంగానే ఉన్నట్లు కనిపిస్తోంది.
రేసులో ఉన్నా ఆఖర్లో చేజారిన పదవి!
ఉత్తమ్ కుమార్ రాజీనామా తర్వాత తెలంగాణ కొత్త పిసిసి అధ్యక్షుడి నియామకానికి సుదీర్ఘ కసరత్తు సాగింది.ఎన్నో పేర్లు వినిపించినప్పటికీ ప్రధానపోటీ రేవంత్ రెడ్డి ,కోమటిరెడ్డి వెంకటరెడ్డి మధ్యే నెలకొంది.నిజానికి కోమటిరెడ్డి వెంకటరెడ్డి పక్కా కాంగ్రెస్ వాది.సుదీర్ఘకాలం మంత్రిగా చేసిన అనుభవం ఉన్న నేత.సీనియర్ మోస్ట్ నాయకుడు.నల్లగొండ జిల్లాను కాంగ్రెస్ కంచుకోటగా మార్చిన ఘనుడు.రేవంత్ రెడ్డి టీడీపీ నుంచి మూడేళ్ల క్రితమే కాంగ్రెస్ లోకి వచ్చి అసెంబ్లీ ఎన్నికల్లో ఓడిపోయి లోకసభ ఎన్నికల్లో గెలిచారు.తెలంగాణ కాంగ్రెస్ నేతల్లో జూనియర్ మోస్ట్ ఎవరైనా ఉన్నారంటే అది రేవంత్ రెడ్డే.అయినా కాంగ్రెస్ యువరాజు రాజీవ్ గాంధీ మోజు పడడంతో రేవంత్ రెడ్డికి పీసీసీ పీఠం దక్కింది.ఇది సహజంగానే కోమటిరెడ్డికి తీవ్ర ఆగ్రహం తెప్పించింది.దీంతో ఆయన బరస్ట్ అయ్యారు.
గట్టిగానే నిరసన తెలిపిన వెంకటరెడ్డి!
ఇకపై తాను గాంధీభవన్ మెట్లు ఎక్కనని .. తన రాజకీయ భవిష్యత్తు అంతా తన కార్యకర్తలే నిర్ణయిస్తారని అన్నారు. టీపీసీసీ కాస్త టీడీపీ పీసీసీగా మారిందని ఘాటైన విమర్శలు చేశారు కోమటిరెడ్డి వెంకట్‌రెడ్డి. టీపీసీసీ పదవిని రాష్ట్ర వ్యవహారాల ఇన్‌చార్జ్ ఠాగూర్ అమ్ముకున్నారని.. ఓటుకు నోటు మాదిరిగానే, నోటుకు పీసీసీని అమ్మేశారని ఆరోపించారు.అయితే తర్వాత ఆయన సర్దుకున్నట్లు కనిపించినప్పటికీ మళ్లీ రేవంత్ రెడ్డి మీద చేసిన తాజా వ్యాఖ్యలు రాజకీయ ప్రాధాన్యతను సంతరించుకున్నాయి.
మీ మీ ఊర్లలో గెలిచి రమ్మన్న వెంకట రెడ్డి!
ఏకంగా పిసిసి అధ్యక్షుడిని బచ్చాగాడు అన్నట్లు కోమటిరెడ్డి మాట్లాడటం ఇక్కడ గమనార్హం.అంతేగాక కొత్తగా పీసీసీ పదవులు చేపట్టిన వారందరూ వారి వారి నియోజకవర్గాల్లో గెలిచి రావాలని కూడా కోమటిరెడ్డి సూచించటం కూడా రేవంత్రెడ్డిని ఉద్దేశించే అంటున్నారు.మొన్నటి అసెంబ్లీ ఎన్నికల్లో రేవంత్ రెడ్డి తన సొంత నియోజకవర్గం కొడంగల్లో ఓడిపోవడం ఇక్కడ గమనార్హం.మొత్తం మీద కోమటిరెడ్డి ఇంకా చల్లబడ లేదని కాంగ్రెస్ వర్గాలు భావిస్తున్నాయి.
